პარტია ლელოს დეპუტატი, ანა ნაცვლიშვილი პარლამენტიდან მოსახლეობას ვაქცინაციისკენ მოუწოდებს. მისი თქმით, იმ პირობებში, როდესაც კორონავირუსით ქვეყანაში ამდენი ადამიანი იღუპება, უმრავლესობის მთავარი სალაპარაკო თემა მხოლოდ ექსპრეზიდენტი, მიხეილ სააკაშვილია. ნაცვლიშვილი აღნიშნავს, რომ ამ ვითარებაში ერთადერთი გამოსავალი ვაქცინაციაა.

"არ ვიცი რა შეფასება შეიძლება მივცე იმ მოცემულობას, რომ მარტო დღეს ისევ 80 ადამიანია მიცვალებული, ამდენი მაცხოვრებელი ზოგიერთ სოფელს აღარ ჰყავს საქართველოში და ეს ცალკე ტრაგედია ამ ქვეყნის. აი, ამ პირობებში, უმრავლესობის, მათ შორის ჯანდაცის კომიტეტის თავმჯდომარის მთავარი სალაპარაკო არის სააკაშვილი და ნაციონალური მოძრაობა. მარტო ევროკავშირისგან კიარა, ქართველი ხალხისგან ხართ ისე შორს, როგორც არასდროს, თქვენც კი არ ყოფილხართ. ჩემდა წილად, მინდა გამოვიყენო საპარლამენტო ტრიბუნა და მივმართო საქართველოს მოქალაქეებს, ხო ცხადია რა რეალობაშიც ვართ. ძალიან გთხოვთ, ძალიან გთხოვთ, აიცერით. სხვა გამოსავალი და ხსნა, რომ ყოველდღე 80 ადამიანს არ ვასაფლავებდეთ, არ არის, ამას ამბობს მეცნიერება. ძალიან გთხოთ, აიცერით", — განაცხადა ნაცვლიშვილმა.

30 ნოემბრის მონაცემებით, საქართველოში კორონავირუსის 5 050 ახალი შემთხვევა დადასტურდა, გამოჯანმრთელდა — 4 214, ხოლო გარდაიცვალა — 80 ადამიანი. სულ აცრილია — 2 170 057, ხოლო დღიურად აიცრა — 13 603 ადამიანი.

საქართველოში ამ დროისთვის 3 სხვადასხვა ვაქცინაა ხელმისაწვდომი, თუმცა ასტრაზენეკათი აცრა მხოლოდ იმ ადამიანებს შეუძლიათ, ვინც ერთი დოზა უკვე გაიკეთა.

უკვე შესაძლებელია ბუსტერითა და ჩანაცვლებით სარგებლობაც. ვაქცინაციისთვის დარეგისტრირება შეგიძლიათ ვებგვერდზე Booking.moh.gov.ge.

იხილეთ იმ დაწესებულებების ჩამონათვალი, სადაც შესაძლებელია ვაქცინაცია. სია პერიოდულად ახლდება და ადგილები ემატება.

ასევე, შეგიძლიათ ნახოთ იმ დაწესებულებების სია, სადაც აცრას წინასწარი რეგისტრაცის გარეშე შეძლებთ. გარდა ამისა, თბილისში მოქმედებს ვაქცინაციის მოძრავი პუნქტები.