პროკურატურის განცხადებით, გაუგებარია, რა გარემოებებით იხელმძღვანელა მოსამართლემ, როცა განზრახ მკვლელობაში ბრალდებული ოლიმპიური ჩემპიონი, ზურაბ ზვიადაური გირაოს სანაცვლოდ გაათავისუფლა. ეს გადაწყვეტილება თელავის რაიონულმა სასამართლომ დღეს მიიღო. ზვიადაურთან ერთად გათავისუფლდა იგივე საქმეზე დაკავებული ჯაბა ჯანგირაშვილიც.

"საქართველოს პროკურატურისთვის გაუგებარია, თუ რას დაეფუძნა და რა გარემოებებით იხელმძღვანელა თელავის რაიონული სასამართლოს მოსამართლე მამუკა წიკლაურმა. ბრალდების მხარე, სასამართლო პროცესზე სრულიად დასაბუთებულად ითხოვდა აღკვეთის ღონისძიების სახით პატიმრობის ძალაში დატოვებას და აპელირებდა რეალურ საფრთხეებზე, რაც თავისუფლებაში ყოფნის შემთხვევაში დაკავშირებულია ბრალდებულთა მიერ შესაძლო ახალი დანაშაულის ჩადენასთან და მოწმეებზე ზემოქმედებასთან [...]

აღსანიშნავია, რომ წინასასამართლო სხდომაზე მიღებული გადაწყვეტილება არ საჩივრდება და ამიტომ მოკლებული ვართ შესაძლებლობას აღნიშნული გადაწყვეტილება გავასაჩივროთ ზემდგომ ინსტანციაში", — წერია განცხადებაში.

ბრალდების მხარეს მიაჩნია, რომ მოსამართლის გადაწყვეტილება არის დაუსაბუთებელი.

წინანდლის ტყეში მომხდარი მკვლელობის საქმეზე დაკავებული ზურაბ ზვიადაური თელავის რაიონულმა სასამართლომ გირაოს სანაცვლოდ გაათავისუფლა. მოსამართლე მამუკა წიკლაურის გადაწყვეტილებით, ზვიადაური სასამართლოს დარბაზიდან 50 000-ლარიანი გირაოს სანაცვლოდ გათავისუფლდა. რაც შეეხება ჯაბა ჯანგირაშვილს, მას 5 000-ლარიანი გირაო შეუფარდეს.

ზურაბ ზვიადაურს აღკვეთის ღონისძიების სახით პატიმრობა თელავის რაიონულმა სასამართლომ 18 აგვისტოს შეუფარდა. დაცვის მხარე მათ გათავისუფლებას გირაოსა და პირადი თავდებობის სანაცვლოდ ითხოვდა. კერძოდ, ადვოკატები 50 000 ლარიან გირაოს შეფარდებას ითხოვდნენ, ასევე, თავდებში უდგებოდნენ ოლიმპიური ჩემპიონები — ლაშა ტალახაძე და ლაშა ბექაური, ასევე ევროპისა და მსოფლიოს ჩემპიონი, ავთანდილ ჭრიკიშვილი და ქართული ოცნების ყოფილი დეპუტატი, ზაქარია ქუცნაშვილი.

ზურაბ ზვიადაური პოლიციამ განზრახ მკვლელობის ბრალდებით 17 აგვისტოს დააკავა. შსს-ს ინფორმაციით, ზვიადაურმა სასიკვდილოდ დაჭრა პირი, რომელმაც მისი ძმა, ზვიად ზვიადაური მოკლა. ის თავს დამნაშავედ არ ცნობს.

გაიგე მეტი: