ყოფილი დეპუტატისა და ოლიმპიური ჩემპიონის, ზურაბ ზვიადაურის სასამართლო პროცესზე, მაშინ, როცა ოლიმპიური ჩემპიონი, ლაშა ბექაური მოსამართლის კითხვებს პასუხობდა, მოსამართლემ მას გამარჯვება მიულოცა. ფაქტის ამსახველი კადრები სასამართლოდან TV პირველმა გაავრცელა.

მანამდე მოსამართლემ დარბაზში სხდომებს შენისვნა მისცა იმის გამო, რომ საუბარს აწყვეტინებდნენ. დიალოგი ასე წარიმართა:

მოსამართლე: რახან თქვენ ბრძანეთ რომ ბავშვობიდან იცნობთ, რა მაინტერესებს იცით, ბატონ ზურაბთან თუ გაქვთ თქვენ იმ სახის კონტაქტი, რომ ყოველდღურად იყოს მისი საქმიანობის, ან მისი ცხოვრების გარკვეულ დეტალებთან დაკავშირებით საქმის კურსში?

ბექაური: მისი ცხოვრების დეტალებთან?

მოსამართლე: დიახ, აი, სად გადაადგილდება ვთქვათ, სად არის, მუდმივად იმ მისამართზე ცხოვრობს თქვენი ინფორმაციით?

ბექაური: არა, ვიცი, რომ მუდმივად ერთ მისამართზე არ არის, აქეთაც არის...

მოსამართლე
: აი, თქვენ თუ ბრძანდებით მუდმივად საქართველოში?

ბექაური: არა, ჩემი სფეროდან გამომდინარე, მიწევს ხოლმე წასვლა.

მოსამართლე: მუდმივად არ ბრძანდებით...

ბექაური: უმეტესად კი, მაგრამ, რაღაც ხშირ შემთხვევაში...

მოსამართლე: ანუ გიწევთ ხომ ვარჯიშებზე?

ბექაური: კი შეჯიბრებებზე.

მოსამართლე: მე ვისარგებლებ ამ შემთხვევით და გილოცავთ. ძალიან ასახელეთ მთელი საქართველო და კიდევ მეტ წარმატებებს გისურვებთ. მხარეს მეტი კითხვა ბატონ ლაშასთან ხომ არ აქვთ?

ცნობილია, რომ ლაშა ბექაურს სურს ზვიად ზვიადაურის თავდები იყოს. ამ საუბრის შემდეგ მოსამართლემ მას განუმარტა, რას ითვალისწინებდა თავდებობა.

ბექაურის გარდა ზვიადაურს თავდებში კიდევ ერთი ოლიმპიური ჩემპიონი, ლაშა ტალახაძე და სხვა სპორტსმენებიც უდგებიან.

ზვიადაური პოლიციამ მკვლელობის ბრალდებით 17 აგვისტოს დააკავა. შსს-ს ინფორმაციით, მან სასიკვდილოდ დაჭრა პირი, რომელმაც მისი ძმა, ზვიად ზვიადაური მოკლა.