შარბათ გულამ, რომელსაც მსოფლიო National Geographic-ის ყდაზე გამოსახული ცნობილი პორტრეტით, სახელად "ავღანელი გოგო" იცნობს, ავღანეთი დატოვა. აგვისტოში ხელისუფლებაში თალიბანის მოსვლის შემდეგ, შარბათს თავშესაფარი იტალიამ მისცა.

იტალიის პრემიერმინისტრის წარმომადგენლების განცხადებით, შარბათ გულამ იტალიას ავღანეთის დატოვებაში დახმარება სთხოვა. მათი განცხადებით, ეს დასავლეთის მიერ ავღანეთიდან მოქალაქეების ევაკუაციის გეგმის ნაწილი იყო. შარბათი უკვე იტალიაშია და, ოფიციალური განცხადების მიხედვით, სახელმწიფო მას იტალიაში ახალი ცხოვრების დაწყებაში დაეხმარება.

შარბათ გულა მსოფლიომ 1984 წელს გაიცნო, როდესაც ფოტოგრაფმა სტივ მაკკერიმ ცნობილი პორტრეტი, სახელად "ავღანელი გოგო" გადაიღო. 12 წლის შარბათის მწვანე თვალებმა მთელი მსოფლიო დაატყვევა. ასე აღმოჩნდა პაკისტანის ლტოლვითა ბანაკში მყოფი შარბათი National Geographic-ის ყდაზე. აღსანიშნავია, რომ 2002 წელს ფოტოგრაფი უკან დაბრუნდა და შარბათი კიდევ ერთხელ იპოვა.

ფოტო: Steve McCurry

2014 წელს პაკისტანში მყოფს სამართალდამცავი ორგანოები ყალბი პაკისტანური პასპორტის ყიდვის ბრალდებით ეძებდნენ. ამის გამო შარბათი ქაბულში გადავიდა, სადაც პრეზიდენტმა თავის სასახლეში უმასპინძლა და ახალი სახლის გასაღებიც გადასცა.

იტალია ერთ-ერთია იმ ქვეყნებს შორის, რომლებმაც ავღანეთში თალიბანის მმართველობის დამყარების შემდეგ მოსახლეობის ევაკუაციაში მიიღო მონაწილეობა.

თალიბანი, რომელიც ავღანეთს 1996-2001 წლებში მართავდა, განსაკუთრებით სასტიკი იყო ქალების მიმართ. მათ აკრძალული ჰქონდათ განათლების მიღება, მუშაობა, გარეთ კაცის გარეშე გასვლა ან საჯაროდ ისეთი ტანსაცმლით სიარული, რომელშიც სხეულის რომელიმე ნაწილი ან სახე დაფარული არ ექნებოდათ. არასრულწლოვანი გოგოების დიდ ნაწილს მათზე ბევრად უფროს კაცებზე აქორწინებდნენ და ნებისმიერი წესის დარღვევის შემთხვევაში, სასტიკად, წამებით ან სიკვდილით სჯიდნენ. არსებული წესები 2001 წელს შეიცვალა, როდესაც აშშ-მ თალიბანის ძალაუფლება დაამხო.