ტელეკომპანია რუსთავი 2-ის დამფუძნებელი და წილების ყოფილი მფლობელი, ჯარჯი აქიმიძე ამბობს, რომ ვებგვერდზე Rustavi2.com პროკურატურაში მათ მიერ შეტანილი საქმის მასალები დაიდება. ამის შესახებ აქიმიძემ დღეს ტელევიზიის კიდევ ერთ დამფუძნებელთან, დავით დვალთან ერთად გამართულ პრესკონფერენციაზე განაცხადა.

"ჩვენ გადავწყვიტეთ, რომ საიტი გამოვიყენოთ ისევ ამ საქმისთვის. ძალიან ბევრი ის მასალა, რომელიც პროკურატურაში არსებობს, დაიდება ამ საიტზე, იქ იქნება ძალიან ბევრი საინტერესო, ძალიან ბევრი უცნობი მასალა. შესაბამისად, თუ პროკურატურა თვითონ არ აპირებს ამ მასალის გამომზეურებას და დასკვნის გაკეთებას, ჩვენ ვიქნებით იძულებული, ის რაც ჩვენ ხელთ არის, სულ ყველაფერი დავდოთ ჩვენს საიტზე, რათა საზოგადოებისთვის ეს ყველაფერი ნათელი გახდეს," - განაცხადა აქიმიძემ.

დავით დვალი კი ამბობს, რომ მათ სჭირდებათ რესურსი, რომ მათ წინააღმდეგ არსებული რუსთავი 2-ის პროპაგანდა დააბალანსონ.

"ესე აღარ იქნება, რომ ჩვენმა საიტმა, რომელიც ჩვენ გვეკუთვნოდა, იმუშაოს ჩვენს წინააღმდეგ, თან უფასოდ, ჩემს ხარჯზე," - განაცხადა დვალმა.

ტელეკომპანია რუსთავი 2-ის ვებგვერდს 2 აპრილის, დაახლოებით 21 საათიდან დვალი და აქიმიძე აკონტროლებენ. ამ დროიდან ვებგვერდზე გაჩნდა წარწერა: "მოგესალმებით დამფუძნებლების ოფიციალურ ვებგვერდზე." ამ დროიდან რუსთავი 2-ის ვებგვერდი მისამართზე Rustavi2.ge-ზეა ხელმისაწვდომი.