სახალხო დამცველი, ნინო ლომჯარია მიხეილ სააკაშვილის პირველ სამ სასამართლო სხდომაზე დაყრდნობით აცხადებს, რომ ამ მიმართულებით, სამომავლოდაც ელოდება ხარვეზებს. მისი თქმით, აქვს კითხვები იამზე, თუ რამდენად იქნება ექსპრეზიდენტის სამართლიანი სასამართლოს უფლება უზრუნველყოფილი.

"პირველმა სამმა განხილვამ ვერ დაადასტურა და პირიქით, დარღვეული იქნა მის მიმართ სამართლიანი სასამართლოსა და სასამართლოსადმი ხელმისაწვდომობის უფლება. ამიტომ ვფიქრობ, რომ რა თქმა უნდა, მე მაქვს კითხვები, რამდენად იქნება მისთვის უზრუნველყოფილი სამართლიანი სასამართლოს უფლება, თუმცა კონკრეტულად ნამდვილად არ მაქვს ახლა პასუხები იმაზე, უნდა მოხდეს თუ არა მისი დროებით გათავისუფლება", — აღნიშნა მან.

ის იმედს გამოთქვამს, რომ ხარვეზებთან დაკავშირებით მისი ეს "უარყოფითი მოლოდინები" არ გამართლდება. ომბუდსმენის განცხადებით, სამომავლოდაც დააკვირდებიან პროცესებს და საკუთარი პოზიციები ექნებათ. გარდა ამისა, ლომჯარიამ ისაუბრა იმაზე, რომ აუცილებელია ექსპრეზიდენტი თავის სხდომებს დაესწროს. მისი თქმით, თუ ეს ვერ მოხერხდება ფიზიკურად, მაშინ დისტანციურად მაინც.

"ჩვენ უკვე შევაფასეთ პირველი სამი პროცესი, სადაც არ მიეცა არცერთი ფორმით დასწრების შესაძლებლობა, როგორც მის მიმართ სამართლიანი და საჯარო უფლების დარღვევა. გარემოებები, რაც წარმოადგინა იუსტიციის სამინისტრომ და პენიტენციურმა სამსახურმა არ იყო იმის სამართლებრივი გამართლება, რის გამოც, მას უარი უთხრეს, დასწრებოდა სასამართლო პროცესებს", — ამბობს ის.

გუშინ იუსტიციის მინისტრმა, რატი ბრეგაძემ განაცხადა, რომ ვინაიდან ექსპრეზიდენტმა შიმშილობა შეწყვიტა, გამოირიცხა ერთი ფაქტორი, რომლის გამოც ის სასამართლოში არ მიჰყავდათ. მისივე თქმით, ექიმების შესაბამისი დასკვნის შემთხვევაში, შესაძლოა, მიხეილ სააკაშვილი შემდგომ სასამართლო პროცესზე დარბაზში მიიყვანონ.

მიხეილ სააკაშვილს დაპატიმრების შემდეგ, უკვე სამჯერ არ მიეცა სასამართლოს წინაშე წარდგომის შესაძლებლობა. სამივე შემთხვევაში მიყვანაზე უარი სპეციალურმა პენიტენციურმა სამსახურმა განაცხადა.

ჯერ კიდევ 5 ნოემბერს იუსტიციის მინისტრმა თქვა, რომ მათი რეკომენდაცია იყო სასამართლო სხდომა ციხეში ჩატარებულიყო, რასაც ადვოკატები და თავად სააკაშვილი არ ეთანხმებოდნენ. 9 ნოემბერს ცნობილი გახდა, რომ სასამართლომ მოსთხოვა პენიტენციურ სამსახურს სააკაშვილი სხდომაზე მიეყვანათ, თუმცა უშედეგოდ — 10 ნოემბერს სააკაშვილის პროცესი მის გარეშე გაიმართა.

უარის მიზეზი უწყებამ იმით განმარტა, რომ ესკორტირებისას, შესაძლოა, მოხდეს "დესტრუქციული ხასიათის ქმედება". მათივე მტკიცებით, ვინაიდან სააკაშვილს შეწყვეტილი ჰქონდა მკურნალობის არსებითი ნაწილი, პროცესზე გაყვანა და დასწრება წარმოადგენდა დამატებით რისკს მისი ჯანმრთელობისთვის.

მომდევნო სხდომაზე, 15 ნოემბერს სააკაშვილი ისევ არ მიიყვანეს და მიზეზებიც იგივე დაასახელეს. 16 ნოემბერს ომბუდსმენმა მოითხოვა, რომ სააკაშვილს სხდომაზე დასწრების უფლება მისცენ, თუმცა ესეც უშედეგო აღმოჩნდა და ექსპრეზიდენტი არც იმ დღეს გამართულ სხდომაზე მიუყვანიათ.