აქტივისტი ბექა წიქარიშვილი ოცნების პარლამენტის ვიცე-სპიკერ თეა წულუკიანს მიმართავს და 15 წლის ლუკა სირაძის მკვლელობიდან 5 წლის გასვლას ახსენებს. მისი თქმით, ეს და კიდევ სხვა მრავალი დაუსჯელი დანაშაული გახდა იმის მიზეზი, რომ ხალხი ქუჩაში დგას და "გაბრაზებულია".

"თეა წულუკიანს აინტერესებდა რატომ არიან გაბრაზებული ეს ახალგაზრდებიო.

ეს ბიჭი თუ გახსოვთ, ქალბატონო თეა?

ჩვენ გვახსოვს, არ ვივიწყებთ და მუდამ გვემახსოვრება.

დღეს პოლიციის მიერ 15 წლის ლუკა სირაძის მკვლელობიდან 5 წელი გავიდა.

ნაცების და ქოცების ჯალათი — მარიანა ჩოლოიანი — ვინც ბიჭი სკოლის კედელზე გაკეთებული წარწერების გამო ("ამ ცხოვრების დედაც") 6-საათიან ფსიქოლოგიურ ტერორში გაატარა და სიცოცხლეზე ხელი ააღებინა, ერთ წელში გაათავისუფლეს ციხიდან და ნაცების, ქოცების და რუსების საერთო კომპანიაში RMG Gold-ში გაამწესეს, სავარაუდოდ ამჯერად კაზრეთელი მუშების ტერორისთვის, კომპანიაში რომელიც ჩვენი ქვეყნის ოქროს რესურსებს რეგიონის ექსპლუატაციისა და გარემოს კატასტროფული განადგურების ხარჯზე წლებია ხაპავს.

ერთ წელში გათავისუფლებული მკვლელის ფონზე, 18-19 წლის ახალგაზრდები რკინის ჯებირის დაზიანებაზე 4-დან 7 წლამდე ციხეს რომ ელოდებიან ეგეც გვახსოვს.

უკანასკნელი სამი კვირის ჯოჯოხეთზე რომ არაფერი ვთქვა, იცოდეთ, რომ ჩემთვის მხოლოდ ლუკა სირაძის ტკივილიც საკმარისია არათუ ბრაზისთვის, არამედ სიძულვილისთვის, რომლის კომპენსირებაც არ ხდება", — წერს სოციალურ ქსელში ბექა წიქარიშვილი.