SEO სააგენტო ალპაკამ 2024 წლის პოპულარული საძიებო სიტყვების დეტალური მიმოხილვა კატეგორიების მიხედვით გამოაქვეყნა. რა აინტერესებდა და რას ეძებდა ქართველი მომხმარებელი ინტერნეტში 2024 წელს?

მოთხოვნა აზარტულ თამაშებზე

2024 წლის მონაცემების მიხედვით, ქართველი ინტერნეტ მომხმარებლების ძიების პრიორიტეტებში წამყვან პოზიციებს Google-ის სერვისები, განსაკუთრებით Translate და საძიებო სისტემა Google ინარჩუნებს.

მიუხედავად ამისა, გასული 12 თვის მონაცემების ანალიზი აჩვენებს საინტერესო სურათს ინტერნეტ მომხმარებლების ძიების პრიორიტეტების შესახებ. კერძოდ, კვლევის თანახმად, ეს აისახება სათამაშო პლატფორმების დომინანტურ პოზიციებზე — ექვსი წამყვანი სათამაშო პორტალის: Adjarabet, Crystalbet, Betlive, Crocobet, Liderbet, Europebet ჯამური ძიების მაჩვენებელი სხვა პოპულარული სერვისების, მათ შორის Google Translate-სა და ამინდის პროგნოზის ჯამურ მაჩვენებლებს არ ჩამოუვარდება.

2024 წლის ყველაზე ხშირად მოძიებული 25 სიტყვიდან 6 სწორედ აზარტული თამაშების ინდუსტრიაზე მოდის.

კვლევის ამ ნაწილს სააგენტო აჯამებს და აღნიშნავს, რომ სტატისტიკა საგანგაშო ტენდენციაზე მიუთითებს. ონლაინ-კაზინოების მაღალი პოპულარობა, შესაძლოა, პირდაპირ მიუთითებდეს აზარტულ თამაშებზე დამოკიდებულ მოქალაქეთა მომატებულ რაოდენობაზე — რაც, თავის მხრივ ქვეყანაში არსებული მძიმე სოციალური ფონის ანარეკლია: მოქალაქეები, ხშირად ახალგაზრდები, სწრაფად გამდიდრებისა და ფინანსური პრობლემებისათვის თავის დაღწევის გზად აზარტულ თამაშებს მოიაზრებენ. განსაკუთრებით შემაშფოთებელია ფაქტი, რომ საგანმანათლებლო რესურსებისა და პროდუქტიული სერვისების ძიება მნიშვნელოვნად ჩამორჩება სათამაშო პლატფორმების პოპულარობას.

ეს მონაცემები ასევე წარმოაჩენს აზარტული თამაშების რეგულირების და საზოგადოების ფინანსური განათლების გაუმჯობესების აუცილებლობას. როდესაც მოსახლეობის დიდი ნაწილი რეგულარულად ეძებს აზარტულ სათამაშო პლატფორმებს, ეს შესაძლოა მიანიშნებდეს არა მხოლოდ გართობის სურვილზე, არამედ პოტენციურად შესაძლოა დაკავშირებული იყოს სერიოზულ სოციალურ-ეკონომიკურ პრობლემებთან.

ბიზნესი და ფინანსები

Alpaca-ს კვლევის მიხედვით, 2024 წლის მონაცემები აჩვენებს ციფრული პლატფორმების მზარდ მნიშვნელობას ბიზნეს სექტორში. TikTok-ის დომინანტური პოზიცია და მასთან დაკავშირებული სერვისების (download, downloader) ძებნის მაღალი მაჩვენებლები ბიზნეს კომუნიკაციებში სოციალური მედია მარკეტინგის გაძლიერებულ როლზე მიუთითებს.

საბანკო სექტორის წარმომადგენლებიდან ტოპ 25 საძიებო სიტყვაში ორი უმსხვილესი ქართული ბანკი მოხვდა. Google Trends-ის მონაცემებით, წლის განმავლობაში საძიებო სიტყვა "tbc" კატეგორიაში მეორე პოზიციას იკავებს, ხოლო "saqartvelos banki" — მეოთხეს, რაც მიუთითებს მომხმარებლების მაღალ ინტერესზე საბანკო სერვისების მიმართ.

საქართველოს ფინანსურ სივრცეში ყველაზე მეტად საძიებო თემები კვლავ სავალუტო კურსებთან და საბანკო მომსახურებასთან არის დაკავშირებული.

მომხმარებლები ძალიან ხშირად ეძებენ აშშ დოლარის კურსთან დაკავშირებულ მონაცემებს სხვადასხვა ვარიაციით. ასევე, საბანკო სექტორიდან გამოსარჩევია Liberty Bank-ის და Rico Credit-ის სერვისებისადმი მაღალი ინტერესი, რაც სწრაფი სესხებისა და ფინანსური პროდუქტების აქტუალობაზე მეტყველებს — იზრდება სწრაფი სესხის კალკულატორებისა და ფინანსური გაანგარიშებების საძიებო აქტიურობა.

რუსულენოვანი ძიების რაოდენობის ზრდა

Alpaca-ს კვლევა კიდევ ერთ მნიშვნელოვან ტენდენციას გამოყოფს:

"ქართულ Google-ში რუსულენოვანი ძიებების მკვეთრი ზრდაა შესამჩნევი. ეს პირდაპირ მიუთითებს საქართველოში რუსულენოვანი აუდიტორიის რაოდენობრივ ზრდაზე, რაც მიგრაციული პროცესების და გეოპოლიტიკური ცვლილებების კონტექსტში საინტერესო სოციალურ ტენდენციას წარმოადგენს", — ვკითხულობთ კვლევაში.

ასევე, Google-ის შემდეგ Yandex მაღალ პოზიციას იკავებს, რაც, ბუნებრივია, შესაძლოა მიუთითებდეს რუსულენოვანი აუდიტორიის მნიშვნელოვან წილზე საქართველოში.

მკვლევრები აფრთხილებენ მკითხველს Yandex-ის გამოყენების საფრთხეების შესახებაც: აღნიშნული პლატფორმა შესაძლოა წარმოადგენდეს კიბერუსაფრთხოების რისკს საქართველოს მოქალაქეებისთვის, რადგან არსებობს პერსონალური მონაცემების გაჟონვის რეალური საშიშროება.