ამერიკის შეერთებული შტატების პრეზიდენტად არჩეული დონალდ ტრამპი პანამის არხზე კონტროლის აღდგენით იმუქრება. ამის შესახებ BBC წერს.

დონალდ ტრამპმა პანამას მოსთხოვა შეამციროს გადასახადი პანამის არხზე, ან დააბრუნოს იგი აშშ-ს კონტროლქვეშ. ტრამპმა უკმაყოფილება გამოთქვა პანამის არხით ამერიკული გემების მიმოსვლის მაღალი ტარიფების გამო.

"პანამას მიერ დაწესებული გადასახადები სასაცილო და ძალიან უსამართლოა", — განუცხადა მან მხარდამჭერებს კვირას არიზონაში გამოსვლისას.

მისმა გამონათქვამებმა პანამის პრეზიდენტის წყენა გამოიწვია, მან თქვა, რომ არხის და მიმდებარე ტერიტორიის "ყოველი კვადრატული მეტრი" მის ქვეყანას ეკუთვნის. ტარიფები კი დადგენილია საბაზრო პირობების და არხის მომსახურებისთვის საჭირო ხარჯების მიხედვით. პანამის პრეზიდენტის თანახმად, არხს არც პირდაპირ და არც ირიბად არ აკონტროლებს არც ჩინეთი, არც ევროკავშირი, არც აშშ და არც სხვა რომელიმე ქვეყანა. პრეზიდენტმა მულინომ ხაზი გაუსვა, რომ პანამის სუვერენიტეტი და დამოუკიდებლობა განხილვის საგანი ვერ იქნება.

პანამის პრეზიდენტის რეაქციას ტრამპმა ირონიით უპასუხა. დონალდ ტრამპმა სოციალურ ქსელ Truth Social-ში დაწერა: "ვნახოთ" და გამოაქვეყნა არხის ფოტო აშშ-ის დროშის ფონზე, სიტყვებით: "კეთილი იყოს თქვენი მობრძანება აშშ-ის არხში".

ამერიკის შეერთებულმა შტატებმა, ტრამპის თანახმად, 110 წლის წინ გახსნილი არხის მშენებლობისთვის დიდი ადამიანური მსხვერპლი და დიდი თანხა გაიღო, პრეზიდენტმა კარტერმა კი "სისულელე" ჩაიდინა და არხი პანამას "ერთ დოლარად მისცა".

ტრამპის განცხადებით, არხი უნდა ემართა პანამას და არა ჩინეთს ან ვინმე სხვას, ამიტომ არ დაუშვებენ, რომ არხი უცხო ხელში აღმოჩნდეს.