საქართველოს პრეზიდენტი ევროპელ ლიდერებსა და საგარეო საქმეთა და უსაფრთხოების პოლიტიკის საკითხებში ევროკავშირის უმაღლეს წარმომადგენელს ესაუბრა.

ამის შესახებ ინფორმაციას პრეზიდენტის ადმინისტრაცია ავრცელებს.

"საქართველოს პრეზიდენტი ესაუბრა ევროკავშირის უმაღლეს წარმომადგენელს საგარეო საქმეთა და უსაფრთხოების პოლიტიკის საკითხებში კაია კალასს, ჩეხეთის რესპუბლიკის პრეზიდენტს, პეტრ პაველს, შვედეთის სამეფოს პრემიერ-მინისტრს, ულფ კრისტერსოს, პოლონეთის რესპუბლიკის პრეზიდენტს, ანჯეი დუდას და ლატვიის რესპუბლიკის პრეზიდენტს ედგარს რინკევიჩს.

საქართველოს პრეზიდენტმა ევროპელ კოლეგებს გააცნო ბიძინა ივანიშვილისადმი მისი შეთავაზება, რაც არის კრიზისიდან ერთადერთი გამოსავალი. შეთავაზება გულისხმობს შეხვედრას ორ მთავარ საკითხზე შესათანხმებლად, რაც არის ახალი არჩევნების თარიღი და ეუთო ოდირის დასკვნის საფუძველზე არჩევნებისთვის ახალი პირობების განსაზღვრა", — წერია განცხადებაში.

სატელეფონო საუბრის შემდეგ, პოლონეთის პრეზიდენტმა ანჯეი დუდამ X-ზე დაწერა, რომ ეუთო/ოდირის რეკომენდაციის შესაბამისად, არსებული კრიზისიდან გამოსავალი ახალი არჩევნებია.

"ვესაუბრე პრეზიდენტ სალომე ზურაბიშვილს საქართველოში არსებულ სიტუაციაზე. დავარწმუნე ქალბატონი პრეზიდენტი ჩემს ურყევ მხარდაჭერაში მისი ხელმძღვანელობისა და ქართველი ხალხის ევროპული მისწრაფებების მიმართ. მათ აქვთ განუყოფელი უფლება იმოძრაონ ერთიანი ევროპისკენ. ახალი არჩევნები, ეუთო/ოდირის რეკომენდაციის შესაბამისად — არის გამოსავალი არსებული კრიზისიდან" — წერს პოლონეთის პრეზიდენტი.