დეპუტატი ელენე ხოშტარია ნიუ ჰოსპიტალსიდან განცხადებას ავრცელებს და ამბობს, რომ მკურნალობის "პროცესი მიდის ისე, როგორც უნდა მიდიოდეს". მისი თქმით, საავადმყოფოში ყოფნა კიდევ ერთი კვირა მოუწევს.

"მეგობრებო, ვაგრძელებ მკურნალობას ნიუ ჰოსპიტალსში. პროცესი მიდის ისე, როგორც უნდა მიდიოდეს. კიდევ ერთი კვირა მომიწევს აქ ყოფნა. ჯერ საკვებზე არ გადავსულვარ, რაღაც სპეციალურ სითხეებს მასმევენ. ალბათ, ზეგიდან შემომაპარებენ საჭმელს ნელ-ნელა. ბოდიში, შეიძლება მესიჯებზე ვერ გიპასუხოთ, ძირითადად მძინავს. მადლობა ყველას", — წერს ხოშტარია სოციალურ ქსელში.

ხოშტარიას ჯანმრთელობის მდგომარეობაზე ისაუბრა დღეს ნიუს ჰოსპიტალსის მორიგე ექიმმაც. ვალერიან ლობჟანიძის ინფორმაციით, ელენე ხოშტარიას მდგომარეობა სტაბილურია, რაიმე სახის გართულება ამ ეტაპზე მოსალოდნელი არ არის.

17-დღიანი შიმშილობის შემდეგ 19 ნოემბერს ელენე ხოშტარიამ შიმშილობა შეწყვიტა. მან განაცხადა, რომ სააკაშვილის გადაყვანა გორის სამხედრო ჰოსპიტალში მისთვის შიმშილობის შეწყვეტის საფუძველია. შიმშილობის შემდგომი რეაბილიტაციისთვის ის ნიუ ჰოსპიტალში გადაიყვანეს. ადგილიდან ხოშტარიამ დაპოსტა, რომ თავს მშვენივრად გრძნობს და მადლობა გადაუხადა რესპუბლიკური საავადმყოფოს ექიმებს, ვახტანგ კალოიანსა და პარლამენტის ადმინისტრაციას.