გორის სამხედრო ჰოსპიტლის ეზოში რეანომობილი და ესკორტი შევიდა — სავარაუდოდ, კლინიკაში ექსპრეზიდენტი მიხეილ სააკაშვილი გადაიყვანეს. ადგილზე მობილიზებულია პოლიცია. ინფორმაციის დადასტურება ამ ეტაპზე არ ხერხდება, რასაც უსაფრთხოების ზომებით ხსნიან.

ადგილზე მივიდნენ სააკაშვილის ადვოკატები, ნიკა გვარამია და დიმიტრი საძაგლიშვილი, ასევე, პირადი ექიმი ნიკოლოზ ყიფშიძე და დედა, გიული ასალანია. გვრამიამ, როგორც რამდენიმე საათის წინ, ახლაც განაცხადა, რომ შესვლას აპირებენ, რადგან სურთ დააკვირდნენ სააკაშვილის შეყვანას კლინიკაში, რომ არ განმეორდეს იგივე, რაც გლდანის ციხეში შეყვანისას.

ფოტო: კადრი ვიდეოდან / მთავარი არხი

გუშინ, 19 ნოემბერს კი იუსტიციის სამინისტრომ მიხეილ სააკაშვილს გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშილობას შეწყვეტს.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მოუწოდებდნენ მთავრობას, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე