ნიუ ჰოსპიტალსის ექიმის განცხადებით, დროას ლიდერის, ელენე ხოშტარიას მდგომარეობა სტაბილურია და ის ექიმების მეთვალყურეობის ქვეშაა. როგორც ექიმი განმარტავს, ხოშტარიას ჯერ არ მიუღია საკვები და ანალიზების კონტროლით, სავარაუდოდ, ხვალ მისცემენ სპეციალურ საკვებს.

მისი თქმით, პირველი რამდენიმე დღე, როცა დაიწყებენ კვების აღდგენას საყურადღებო იქნება, ამიტომ ხოშტარია ჰოსპიტალური დაკვირვების ქვეშ იქნება.

"ამჟამად ელენე ხოშტარიას მდგომარეობა არის სტაბილური, ის იმყოფება პალატაში მუდმივი მეთვალყურეობის ქვეშ, მიმდინარეობს მისი სასიცოცხლო მაჩვენებლების მონიტორინგი, რომელიც სტაბილურია. დაწყებულია ელექტროლიტების შევსება, რაც შეეხება საკვების ულუფას, ჯერჯერობით არ მიუღია, ამას გარკვეული წესი და პროტოკოლი აქვს, რომლის მიხედვითაც შესაბამისი მაჩვენებლების კონტროლით და მონიტორინგით, განვახორციელებთ, სავარაუდოდ, ხვალ", — განაცხადა მან TV პირველის ეთერში.

ექიმი განმარტავს, რომ კვების აღდგენისას კალორაჟის არასწორი დაცვის შემთხვევაში, შესაძლოა, გარკვეული გართულებები მოყვეს. მისი თქმით, ამის პრევენციისთვის, მუდმივად გააკონტროლებენ ანალიზებს.

"პირველი ულუფა, რაც პერორალურად მიეცემა პაციენტს ეს იქნება სპეციალური დამატებითი საკვები, სადაც ზუსტად განსაზღვრული იქნება ის კალორაჟი, რაც მას სჭირდება პირველი ეტაპისთვის. შემდგომ ამ კალორაჟს ეტაპობრივად გავზრდით, ისევ მაჩვენებლების მიხედვით", — განაცხადა მან.

რამდენიმე საათის წინ ხოშტარიამ განაცხადა, რომ სააკაშვილის გადაყვანა გორის სამხედრო ჰოსპიტალში მისთვის შიმშილობის შეწყვეტის საფუძველია. შიმშილობის შემდგომი რეაბილიტაციისთვის ის ნიუ ჰოსპიტალში გადაიყვანეს. ადგილიდან ხოშტარიამ დაპოსტა, რომ თავს მშვენივრად გრძნობს და მადლობა გადაუხადა რესპუბლიკური საავადმყოფოს ექიმებს, ვახტანგ კალოიანსა და პარლამენტის ადმინისტრაციას.