23 ევროპარლამენტარი მიხეილ სააკაშვილის მდგომარეობასთან დაკავშირებით წერილს აქვეყნებს და აცხადებს, რომ ევროკავშირმა სერიოზულად უნდა განიხილოს სანქციები იმ პირების მიმართ, ვინც ექსპრეზიდენტის არაადამიანური და დამამცირებელი მოპყრობა დაუშვა.

წერილი ევროპარლამენტის პრეზიდენტს ურსულა ფონ დერ ლაიენს, ევროკავშირის უმაღლეს წარმომადგენელს საგარეო საკითხებში ჯოზეფ ბორელს და ევროსაბჭოს პრეზიდენტ შარლ მიშელს დაეგზავნა.

"ჩვენ შეშფოთებას გამოვხატავთ გლდანის ციხეში მოთავსებული სააკაშვილის მდგომარეობის სწრაფ გაუარესებასთან დაკავშირებით. მიუხედავად იმისა, ის დამნაშავეა თუ არა მის მიმართ წაყენებულ ბრალდებებში, მის უფლებებსა და ღირსებას პატივი უნდა ეცეს. როგორც ჩანს, მას ადეკვატურ სამედიცინო მკურნალობაზე უარს ეუბნებიან პოლიტიკური ნიშნით. გარდა ამისა, პენიტენციურმა დაწესებულებამ თბილისის საქალაქო სასამართლოში საკუთარ სხდომებზე დასწრებაზე უარი უთხრა.

ჩვენ გვჯერა, რომ ევროკავშირმა სასწრაფო ზომები უნდა მიიღოს, რადგან დგას გამოუსწორებელი ზიანის გარდაუვალი რისკი.

დამატებით, ევროკავშირმა სეროზულად უნდა განიხილოს სანქციები იმ პირთა მიმართ, ვინც სააკაშვილის არაადამიანური და დამამცირებელი მოპყრობა დასაშვები გახადა", — აცხადებენ ისინი.

სავარაუდოდ, წერილი მანამდეა დაწერილი, სანამ მთავრობა ექსპრეზიდენტს გორის სამხედრო ჰოსპიტალში გადაყვანას შესთავაზებდა და სააკაშვილი დათანხმდებოდა, რადგან ტექსტში საუბარია იმაზე, რომ მას შესაბამისი მკურნალობა სჭირდება.

სააკაშვილი 50 დღე შიმშილობდა. ადვოკატები, სამედიცინო სფეროს წარმომადგენლები, ომბუდსმენი, მხარდამჭერები, საერთაშორისო პარტნიორები მოუწოდებდნენ მთავრობას, ექსპრეზიდენტი სამოქალაქო კლინიკაში გადაეყვანა, თუმცა ამის ნაცვლად ის ძალის გამოყენებით გლდანის ციხის სამკურნალო დაწესებულებაში გადაიყვანეს. ამის გამო, პროტესტის ნიშნად, სააკაშვილმა სამედიცინო მომსახურებაზე უარი თქვა და მისი მდგომარეობა დამძიმდა, რის შემდეგაც მოწოდებები გადაყვანაზე გახშირდა, თუმცა ხელისუფლება უარზე იყო.

სტრასბურგის სასამართლოს გადაწყვეტილების შემდეგ, რომელმაც სააკაშვილს შიმშილობის შეწყვეტისკენ მოუწოდა, ხოლო სახელმწიფოს მის ჯანმრთელობაზე ინფორმაციის მიწოდებისა და შიმშილობის მერე ადეკვატური მკურნალობა დაავალა, ექსპრეზიდენტმა განაცხადა, რომ შიმშილობას შეწყვეტს, თუ სამოქალაქო კლინიკაში გადაიყვანენ. პასუხად იუსტიციის მინისტრმა თქვა, რომ მოხარული იქნებიან თუ არ იშიმშილებს, მაგრამ დათქმების გარეშე.

დღეს, 19 ნოემბერს კი იუსტიციის სამინისტრომ მას გორის სამხედრო ჰოსპიტალში გადაყვანა შესთავაზა, რასაც ექსპრეზიდენტი დათანხმდა და განაცხადა, რომ განთავსებისთანავე შიმშლობას შეწყვეტს.