რამდენიმე დღის წინ საჯაროდ გახდა ცნობილი, რომ თამთა მელაშვილის რომანის შაშვი შაშვი მაყვალი მიხედვით ფილმის გადაღება იგეგმებოდა. პროექტი დაფინანსების მოლოდინში იყო და ამჟამად უკვე ისიც ვიცით, რომ შემოქმედებითმა გუნდმა ჰიუბერტ ბალსის ფონდის გრანტი მოიპოვა!

როტერდამის საერთაშორისო კინოფესტივალის მიერ შექმნილი ჰიუბერტ ბალსის ფონდი ტრადიციულად გამოარჩევს ხოლმე რამდენიმე განსაკუთრებულ კინოპროექტს და მათ შემოქმედებს 10 000 ევროს ოდენობის ფულადი გრანტით აფინანსებს, რითაც საავტორო კინოს განვითარებას უწყობს ხელს.

სულ ახლახან გამოცხადდნენ ამ პროექტის ფარგლებში ახალი ფავორიტები და მათ შორის ელენე ნავერიანის ფილმიც მოხვდა: 520 კანდიდატიდან ათ საუკეთესოში ქართველი რეჟისორის ნამუშევარიც შეირჩა.

პირველი კადრი რომანის შაშვი შაშვი მაყვალი ეკრანიზაციიდან

ფოტო: ALVA FILM/TAKES FILMS

ელენე ნავერიანს აქამდე გადაღებული აქვს ორი სრულმეტრაჟიანი ფილმი მე მზის წვეთი ვარ დედამიწაზე და სველი ქვიშა. რომანის შაშვი შაშვი მაყვალი ეკრანიზაცია მისი მესამე სრულმეტრაჟიანი კინოსურათი იქნება.

"როცა [რომანი] წავიკითხე, წარმოვიდგინე, როგორი შთამბეჭდავი, გამაძლიერებელი და წინააღმდეგობრივი იქნებოდა ამ ისტორიის ეკრანზე ხილვა", — განუცხადა ელენე ნავერიანმა ამერიკულ გამოცემა Variety-ს.

ამ მომავალი ფილმის პროდიუსერები თომას რეიხლინი და ქეთი დანელია იქნებიან. აღსანიშნავია, რომ ეს უკანასკნელი იყო ასევე გახმაურებული შვედურ-ქართული პროექტის და ჩვენ ვიცეკვეთ პროდიუსერი.

შაშვი შაშვი მაყვალი თამთა მელაშვილის მესამე რომანია, რომელიც 2021 წელს გამოქვეყნდა და მალევე მოიგო მრავალი ქართველი მკითხველის გული და წიგნი ადგილობრივ ბესტსელერადაც იქცა.

აღსანიშნავია, რომ წიგნის მიხედვით უკვე დაიდგა სპექტაკლიც ზუგდიდის შალვა დადიანის სახელობის პროფესიულ სახელმწიფო დრამატულ თეატრში

ასევე იხილეთ: