ექსპრეზიდენტ მიხეილ სააკაშვილის ადვოკატის, დიმიტრი საძაგლიშვილის განცხადებით, ქართული ოცნების თავმჯდომარეს, ირაკლი კობახიძეს ყველა, ვინც მისთვის მიუღებელ პოზიციას აფიქსირებს "ნაცი" ჰგონია. ადვოკატის თქმით, კობახიძეს, მგონი, მარტო მისი პარტიის წევრი, მამუკა მდინარაძე არ ჰგონია "ნაცი".

"რეალურად, ჩვენ არ ვართ მიჩვეული ადეკვატური განცხადებების მოსმენას ირაკლი კობახიძის მხრიდან, მისთვის ყველა, ვინც მისთვის მიუღებელ, არასასიამოვნო პოზიციას აფიქსირებს, არის "ნაცი", მგონი, მარტო მამუკა მდინარაძე არ ჰგონია "ნაცი". შესაბამისად, მის განცხადებებს რა რეალური შედეგები მოჰყვება, ჩემთვის უცნობია და ვერც გავაკეთებ პროგნოზსს, იმდენად არაადეკვატურად იქცევა ქართული ოცნების ხელისუფლება", — აღნიშნა მან.

დღეს ირაკლი კობახიძემ სახალხო დამცველისა და მის მიერ შექმნილი ექიმთა ჯგუფის წევრების შესაძლო პასუხისმგებლობაზე ისაუბრა. მან ექიმთა ჯგუფის დასკვნას "ფეიკი" უწოდა და განაცხადა, რომ თუ ის მიხეილ სააკაშვილის სამოქალაქო კლინიკაში გადაყვანის საფუძველი გახდება და ამას მოჰყვება ის სცენარი, "რომლისაც ეშინიათ", მას შესაძლოა, როგორც სახალხო დამცველის, ასევე, კონკრეტული ექიმების პასუხისმგებლობაც მოჰყვეს.

ქართული ოცნების წევრები სახალხო დამცველს, ნინო ლომჯარიას ხშირად ადანაშაულებენ პარტიულობასა და მიკერძოებულობაში. ამ მხრივ ყველაზე მეტად გამოირჩევა ირაკლი კობახიძე. 25 ოქტომბერს მან განაცხადა, რომ ნინო ლომჯარია ნაციონალური მოძრაობის "ერთ-ერთ რიგით აქტივისტად აქციეს". ამასთანავე, კობახიძე პოლიტიკურად მიკერძოებულს უწოდებს ომბუდსმენის მიერ შექმნილი ექიმთა ჯგუფის წევრებსაც.

ხელისუფლების კრიტიკის შემდეგ ომბუდსმენს აშშ-ის ელჩი საქართველოში კელი დეგნანი და ევროპარლამენტარები გამოექომაგნენ, რომლებმაც აღნიშნეს, რომ სახალხო დამცველის ინსტიტუტი კრიტიკას ნაცვლად, ქებას იმსახურებს.

ექსპრეზიდენტის სამედიცინო მომსახურების მონიტორინგის მიზნით, სახალხო დამცველმა სამედიცინო ექსპერტთა ჯგუფი 17 ნოემბერს წარადგინა. ჯგუფის მიზანი იყო, რომ შეაფასოს რამდენად შეესაბამება ექსპრეზიდენტის ჯანმრთელობის უფლების დაცვას N18 სამკურნალო დაწესებულება ამჟამად და იქნება თუ არა ამ დაწესებულებაში ადეკვატური სამედიცინო სერვისის მიწოდება შესაძლებელი პატიმრის მიერ ხანგრძლივი შიმშილობის შეწყვეტის შემდეგ.

გუშინ სახალხო დამცველის მიერ შექმნილმა ექიმების ჯგუფმა მიხეილ სააკაშვილის ჯანმრთელობის მდგომარეობაზე დასკვნა გამოაქვეყნა. მათი შეფასებით, ექსპრეზიდენტის მდგომარეობა კრიტიკულია და მკურნალობის გაგრძელება რეკომენდებულია ფუნქციურად გამართულ, დიდი გამოცდილების მქონე პოლიპროფილურ ჰოსპიტალში. ექიმების დასკვნის მიხედვით, ამ პირობებს მე-18 დაწესებულების კლინიკა არ აკმაყოფილებს. მბუდსმენის ამ გადაწყვეტილების შემდეგ მმართველ გუნდში კრიტიკა გაძლიერდა.