მიხეილ სააკაშვილის პირადი ექიმი, ნიკოლოზ ყიფშიძე ექსპრეზიდენტის სანახავად ისევ არ შეუშვეს. მისი თქმით, სთხოვეს დალოდებოდა ნებართვის გაცემას, თუმცა თითქმის 6 საათიანი ლოდინის შემდეგ უთხრეს, რომ უკვე გვიანია და შეხვედრა გადაედო. აღსანიშნავია, რომ მას სააკაშვილის ნახვაზე უარი გუშინაც იგივე მიზეზით უთხრეს. ყიფშიძე ამბობს, რომ ციხის საავადმყოფოსთან ხვალ დილით მივა და იმედოვნებს, რომ ამ შემთხვევაში მაინც მოახერხებს პაციენტის ნახვას. მისი განცხადებით, მიხეილ სააკაშვილის ჯანმრთელობის მდგომარეობის შესახებ ამ ეტაპზე განახლებულ ინფორმაციას არ ფლობს.

"მიზეზი სულ სხვადასხვანაირია: ხან დაკავებულია, ხან მითხრეს, რომ მოიცადე და ა.შ. ახლა, ბოლო მიზეზი მითხრეს, რომ ძალიან გვიან არის და რასაკვირველია, შესვლა, ჯობია, გადავდოთ ხვალისთვისო [...] მე არ ვიცი რას შეიძლება უკავშირდებოდეს, მაგრამ, ეს ნამდვილად არანორმალური ფაქტია, ჩემი აზრით. ვერაფრით ვერ ვნახე ავადმყოფი უკვე მესამე დღეა, მე მგონი", — განაცხადა ყიფშიძემ.

რამდენიმე საათის წინ ყიფშიძეს ციხის საავადმყოფოში შესვლაზე უარი იმ მიზეზით უთხრეს, რომ ექსპრეზიდენტთან სახალხო დამცველი ნინო ლომჯარია და მისი ინიციატივით შექმნილი სამედიცინო ექსპერტთა ჯგუფის წევრები იყვნენ. ყიფშიძე ამბობდა, რომ პაციენტის მონახულება სწორედ კონსილიუმთან ერთად უნდოდა, თუმცა რადგან არ უშვებდნენ გადაწყვეტილი ჰქონდა ექსპრეზიდენტი მათი გამოსვლის შემდეგ მოენახულებინა. ლომჯარიასა და ექსპერტთა ჯგუფის მიერ ციხის საავადმყოფოს დატოვების შემდეგ, როგორც უკვე აღვნიშნეთ, ყიფშიძეს განუცხადეს, რომ ახლა უკვე გვიანია და სააკაშვილის სანახავად სხვა დროს მოსულიყო.

რაც შეეხება სახალხო დამცველსა და მისი ინიციატივით შექმნილ ექსპერტთა ჯგუფს, ნინო ლომჯარიას განცხადებით, მათ მიეცათ სრულყოფილი შესაძლებლობა შეესწავლათ მიხეილ სააკაშვილის ჯანმრთელობის მდგომაროება და ციხის საავადმყოფოში არსებული ვითარება. სახალხო დამცველი ამბობს, რომ უახლოეს პერიოდში მოამზადებენ წერილობით დასკვნას შეხვედრის შესახებ. კონსილიუმის ერთ-ერთი წევრის, ანესთეზიოლოგ-რეანიმატოლოგ გიორგი გრიგოლიას პირველადი შეფასებით კი ციხის საავადმყოფოში სააკაშვილის მკურნალობა მიზანშეწონილი არ არის.

გაიგე მეტი: