პარტია ლელოს თავმჯდომარე, მამუკა ხაზარაძე აცხადებს, რომ ექსპრეზიდენტ მიხეილ სააკაშვილის გორის ჰოსპიტალში გადაყვანის იდეა არა ოპოზიციას, არამედ პარლამენტის თავმჯდომარეს ეკუთვნის. ასე გამოეხმაურა ის კახა კუჭავას განცხადებას იმის შესახებ, რომ ოპოზიციამ მას სააკაშვილის გორის ჰოსპიტალში გადასაყვანად შუამდგომლობა სთხოვა.

მამუკა ხაზარაძის ინფორმაციით, ოპოზიციის ლიდერებისა და კუჭავას შეხვედრა 8 ნოემბერს, სააკაშვილის ციხის საავადმყოფოში გადაყვანამდე შედგა. მისი თქმით, მათ პარლამენტის თავმჯდომარეს სთხოვეს მმართველი პარტიისა და ოპოზიციის ლიდერების შეხვედრის ორგანიზება ექსპრეზიდენტზე სასაუბროდ. ხაზარაძე ამტკიცებს, რომ მათ კუჭავასგან უარი მიიღეს, შეხვედრიდან ორ საათში კი სააკაშვილი რუსთავის ციხიდან გლდანის სამკურნალო დაწესებულებაში მოტყუებით გადაიყვანეს.

"გორი თვითონ ახსენა. გორიც შეიძლება ამ სიაში იყოსო [იკითხა]. ჩვენთვის გორიც მისაღები იქნებოდა და ნებისმიერი კლინიკა მისაღები იქნებოდა. მთავარია, ლაპარაკი იყო, რომ ციხეში მას რამე არ დამართნოდა. რა მოხდა რეალურად? ზუსტად ამ შეხვედრის მერე მან თქვა, რომ მე ეს გავლენა არა მაქვს — უნდა ვთქვა, რადგანაც მან გახსნა ეს თემა, მაქვს უფლება, რომ მეც ვთქვა, რაზეც იყო იქ საუბარი — მან თქვა, რომ ალბათ გაჭირდება ამის ორგანიზება, რაც პრაქტიკულად დადასტურდა, იმიტომ, რომ ჩვენ რომ გვხვდებოდა, ამ დროს სპეცოპერაცია მზადდებოდა თურმე და ორ საათში მიხეილ სააკაშვილი რუსთავის ციხიდან გადაიყვანეს გლდანში.

ე.ი. ან საქმის კურსში არ არის საერთოდ ეს სპიკერი და მე ასე მგონია, რომ საერთოდ არავინ არაფერს არ ეკითხება, სამწუხაროდ და მეორე შემთხვევაში, არანაირი ზეგავლენა არ ჰქონდა, რომ ეს შეხვედრა ჩანიშნულიყო", — განაცხადა ხაზარაძემ TV პირველის ეთერში.

15 ნოემბერს, პარლამენტის ბიუროს სხდომაზე კახა კუჭავამ განაცხადა, რომ ოპოზიციამ მას სააკაშვილის გორის ჰოსპიტალში გადასაყვანად შუამდგომლობას სთხოვდა. კუჭავას მტკიცებით, ამ შეთავაზებიდან მეორე დღეს თავად ოპოზიციამ გააჟღერა ინფორმაცია, თითქოს ეს იდეა ქართულ ოცნებას ეკუთვნოდა და ისინი სააკაშვილის ოსებისთვის გადაცემას აპირებდნენ.

1-ელ ნოემბერს, მიხეილ სააკაშვილის ადვოკატმა, ნიკა გვარამიამ განაცხადა, რომ სააკაშვილის გორის ჰოსპიტალში გადაყვანა, შემდეგ კი "ოსური სპეცრაზმის" მიერ მისი გატაცება იგეგმებოდა. პენიტენციურმა სამსახურმა უარყო, რომ სააკაშვილი გორში გადაჰყავთ.

8 ნოემბერს, მას შემდეგ რაც ცნობილი გახდა, რომ სააკაშვილი რუსთავის ციხიდან გაიყვანეს, გორის სამხედრო ჰოსპიტალში განაცხადეს, რომ სააკაშვილის გადაყვანის შესახებ ინფორმაცია არ ჰქონდათ, მაგრამ მზად იყვნენ მის მისაღებად.