ეკონომიკის მინისტრის, ნათია თურნავას განცხადებით, ეჭვი არ ეპარებათ, რომ წლევანდელი წელი ორნიშნა ეკონომიკური ზრდით დასრულდება. ამის შესახებ მან მთავრობის სხდომის დასრულების შემდეგ ისაუბრა.

"პირველი შედეგები გამოიღო უკვე ჩვენმა პოლიტიკამ, რომელიც არის ორიენტირებული იმპორტის ჩანაცვლებასა და ექსპორტის წახალისებაზე და ეს არის ჩვენი პოლიტიკის შედეგი, რომ ექსპორტი გაცილებით უფრო სწრაფი ტემპით იზრდება, ვიდრე იმპორტი და ზოგადად, ექსპორტის ზრდა ეს არის დიდი შემომტანი მთლიანად ეკონომიკურ ზრდაში და როგორც აქამდე მოგახსენებდით, ჩვენ ეჭვი არ გვეპარება, რომ წლევანდელი წელი დასრულდება ორნიშნა ეკონომიკური ზრდით.

ეს არ ნიშნავს იმას, რომ ჩვენ ყველა პრობლემა გადავწყვიტეთ და უკან მოვიტოვეთ, მაგრამ ეს არის ძალიან კარგი საფუძველი იმისა, რომ მივაღწიოთ სიღარიბის დაძლევას და შევქმნათ მეტი დასაქმება ჩვენი პროგრამების საშუალებით", — განაცხადა მან.

საქსტატის წინასწარი მონაცემებით, მიმდინარე წლის იანვარ-ოქტომბერში საქართველოდან განხორციელებული ექსპორტისა და იმპორტის მოცულობა გაიზარდა.

უფრო კონკრეტულად, 2021 წლის იანვარ-ოქტომბერში საქართველოდან ექსპორტზე 3,39 მილიარდი დოლარის საქონელი გავიდა, რაც გასული წლის იმავე პერიოდთან შედარებით 24,9%-ით მეტია.

რა შეეხება იმპორტს, მიმდინარე წლის 10 თვეში უცხოეთიდან 7,96 მილიარდი დოლარის საქონელი ვიყიდეთ — ეს მონაცემი 2020 წლის იმავე პერიოდთან შედარებით 22,3%-ით არის გაზრდილი.

შესაბამისად, იანვარ-ოქტომბერში საგარეო სავაჭრო ბრუნვამ, ანუ ექსპორტისა და იმპორტის ჯამმა 11,35 მილიარდ დოლარს მიაღწია, ხოლო უარყოფითი სავაჭრო ბალანსის მოცულობა (ექსპორტსა და იმპორტს შორის სხვაობა) 4,57 მილიარდი დოლარი იყო.

სტატისტიკის მიხედვით, მხოლოდ ოქტომბერში 411,1 მილიონი დოლარის საქონელი გავყიდეთ (წლიური ზრდა — 31,4%), ხოლო იმპორტის მოცულობამ 904 მილიონ დოლარს (წლიური ზრდა — 24%) მიაღწია.