ავსტრიის კანცლერის, ალექსანდრ შალენბერგის განცხადებით, ორშაბათიდან ავსტრიაში არავაქცინირებული ადამიანებისთვის ლოქდაუნი წესდება. ამის მიზეზად მან ვაქცინაციის "სამარცხვინოდ დაბალი" მაჩვენებელი დაასახელა.

ახალი წესი იმას გულისხმობს, რომ ადამიანებს, რომლებიც სრულად ვაქცინირებულნი არ არიან, გარეთ გასვლა მხოლოდ აუცილებელ შემთხვევებში შეეძლებათ, მაგალითად, ექიმთან ვიზიტისას, სამსახურში წასასვლელად ან სურსათის შესაძენად. ახალი წესის მოქმედებას სპეციალური უფლებამოსილებით აღჭურვილი პირები პერიოდული შემოწმებებით გააკონტროლებენ.

აღსანიშნავია, რომ აუცრელი ადამიანებისთვის სასტუმროებში, გასართობ დაწესებულებებსა და რესტორნებში შესვლა აქამდეც შეზღუდული იყო.

შალენბერგის განცხადებით, ლოქდაუნი ამ ეტაპზე ორ რეგიონში — ზემო ავსტრიასა და ზალცბურგში იმოქმედებს. ამ რეგიონებში არავაქცინირებულთა რიცხვი განსაკუთრებით მაღალია.

ავსტრიაში კოვიდინფიცირებულთა რიცხვმა ბოლო პერიოდში განსაკუთრებით იმატა. შაბათს ინფიცირების 13 ათასზე მეტი ახალი შემთხვევა დაფიქსირდა. ავსტრიაში მოსახლეობის 65%-ია სრულად ვაქცინირებული, რაც დასავლეთ ევროპაში ერთ-ერთი ყველაზე დაბალი მაჩვენებელია.