20-მა არასამთავრობო ორგანიზაციამ, ყოფილი პრეზიდენტის, მიხეილ სააკაშვილის უფლებრივი მდგომარეობის მონიტორინგის მიზნით, ევროპის საბჭოს წამების პრევენციის კომიტეტს მიმართა. არასამთავროებოები აღნიშნავენ, რომ საერთაშორისო ავტორიტეტული მონიტორინგის ორგანოს მიერ საქართველოს პენიტენციურ სისტემაში არსებული მდგომარეობის, მათ შორის, პატიმრობაში მყოფი ესპრეზიდენტის მიმართ მოპყრობის შეფასება მნიშვნელოვანია ადამიანის უფლებების დაცვის გაუმჯობესების თვალსაზრისით.

"უკანასკნელ ხანებში, საქართველოში მოქმედი უფლებადაცვითი ორგანიზაციები ყოველდღიურად ვხდებით საქართველოს მესამე პრეზიდენტის, მიხეილ სააკაშვილის მიმართ არაადამიანური და დამამცირებელი მოპყრობის თვითმხილველები. აღნიშნული, პირველ რიგში, გამოიხატება მისი, როგორც მოშიმშილე პატიმრის და პაციენტის უფლებების უხეშ დარღვევაში, რაც შესაძლოა შეფასდეს, როგორც პატიმრის მიმართ არაადამიანური და დამამცირებელი მოპყრობა", — ნათქვამია არასამთავრობოების მიმართვაში.

NGO-ები მიმართვაში აღნიშნავენ, რომ გლდანის მე-18 პენიტენციური დაწესებულების საავადმყოფო სააკაშვილისთვის წარმოადგენს საფრთხეს, როგორც ფიზიკური უსაფრთხოების, ასევე ფსიქოლოგიური ზეწოლისგან დაცვის თვალსაზრისითაც. მიმართვაში ნათქვამია, რომ მე-18 დაწესებულებაში მიუხედავად სააკაშვილის უარისა და ძალის გამოყენებით, პაციენტის ინფორმირებული თანხმობის პრინციპების სრული იგნორირებით გადაიყვანეს.

"#18 დაწესებულება მდებარეობს #8 დაწესებულების ტერიტორიაზე, რომელში გათავსებული პატიმრების დიდი ნაწილი კრიმინალური სუბკულტურის მიმდევარია, ხოლო სააკაშვილის მმართველობა ასოცირდება კრიმინალურ სამყაროსთან ბრძოლასთან, რაც თავისთავად მაქსიმალურად ზრდის მასზე ფიზიკური ზემოქმედების რისკს სხვა პატიმრების მხრიდან", — წერენ NGO-ები.

არასამთავრობოები ასევე საუბრობენ მმართველი გუნდის წევრების მხრიდან გაკეთებულ განცხადებებზე და ხაზს უსვამენ, პენიტენციურის გავრცელებულ კადრებს.

"პატიმარ სააკაშვილის მიმართ არაადამიანური და დამამცირებელი მოპყრობის ნაწილია მაღალი თანამდებობის პირების და საჯარო უწყებების არაერთი განცხადება, რომლებიც პირდაპირ იყო მიმართული მოშიმშილე პატიმრის მდგომარეობის დამძიმებისა და მისი პროვოცირებისკენ, უარი ეთქვა სამედიცინო პერსონალის მიერ რეკომენდებული, სასიცოცხლოდ საჭირო ნივთიერებების მიღებაზე და სრულ შიმშილობაზე გადასულიყო", — ვკითხულობთ მიმართავში.

მიმართვას ხელს აწერენ არასამთავრობოები:

• დემოკრატიისა და უსაფრთხო განვითარების ინსტიტუტი IDSD;
• საქართველოს დემოკრატიული ინიციატივა GDI;
• ცენტრი ემპათია;
• ინიციატივა მოწყვლადი ჯგუფების რეაბილიტაციისთვის RIVG;
• საზოგადოება და ბანკები;
• ციხის საერთაშორისო რეფორმა PRI;
• კვლევითი ჟურნალისტიკის და ეკონომიკური ანალიტიკის ცენტრი;
• საერთაშორისო გამჭვირვალობა საქართველო TI;
• ტოლერანტობისა და მრავალფეროვნების ინსტიტუტი TDI;
• უფლებები საქართველო Rights Georgia;
• საქართველოს რეფორმების ასოციაცია GRASS;
• მმართველობის მონიტორინგის ცენტრი GMC;
• მედიის განვითარების ფონდი MDF;
• სამართლიანი არჩევნებისა და დემოკრატიის საერთაშორისო საზოგადოება ISFED;
• ღია საზოგადოების ფონდი OSGF;
• ეკონომიკური პოლიტიკის კვლევის ცენტრი EPRC;
• ადამიანის უფლებათა ცენტრი HRC;
• საფარი;
• საქართველოს ატლანტიკური საბჭო;
• ჭავჭავაძის ცენტრი.

მიხეილ სააკაშვილი პირველ ოქტომბერს, მას შემდეგ დააკავეს, რაც Facebook-ზე ვიდეო გამოაქბვეყნა, სადაც ჩანდა, რომ ბათუმში იმყოფებოდა. მან შიმშილობა დაკავების დღიდან დაიწყო.

ხოლო გუშინ გუშინ, 11 ნოემბერს თქვა, რომ შიმშილობას შეწყვეტდა, თუ სამოქალაქო კლინიკასი გადაიყვანდნენ.