ნაციონალური მოძრაობის თავმჯდომარემ, ნიკა მელიამ ხვალ მორიგი აქციები დააანონსა. მისი თქმით, 12 ნოემბერს, 14:00 საათზე ორ სხვადასხვა ლოკაციაზე შეიკრიბებიან.

"ხვალ ვიკრიბებით სამასი არაგველის მეტროსთან დღის 2 საათზე და დიდუბის მეტროსთან, ქვედა შესასვლელ-გამოსასვლელთან 2 საათზე. ბრძოლა გამარჯვებამდე, ბრძოლა ამ ქვეყნის გათავისუფლებამდე და ბრძოლა ამ ქვეყნის უკეთეს მომავლამდე", — განაცხადა მან.

ოპოზიციის აქციები რამდენიმე დღეა იმართება. 8 ნოემბერს ექსპრეზიდენტის, მიხეილ სააკაშვილის მხარდასაჭერ აქციაზე ნიკა მელიამ უწყვეტი პროტესტი დააანონსა. მოგვიანებით, მან უფრო დეტალურად ისაუბრა სამომავლო გეგმებსა და სტრატეგიაზე.

მელიას თქმით, ყოველი დღის ბოლოს მომდევნო დღის გეგმების შესახებ გახდება ცნობილი და საზოგადოებას საპროტესტო აქციების ლოკაციებს შეატყობინებენ. თუმცა ენმ-ს თავმჯდომარის განცხადებით, ყოველთვის იქნება ერთი წერტილი, რომელსაც არ დაასახელებენ. მისი განმარტებით, ხელისუფლებას ძველი მიდგომით "ამოსუნთქვის საშუალებას" აძლევდნენ, თუმცა ახლა საპირისპიროდ იმოქმედებენ.

დღეს მიხეილ სააკაშვილმა განაცხადა, რომ როგორც კი სათანადო დაწესებულებაში გადაიყვანენ, შიმშილობას შეწყვეტს. ეს გადაწყვეტილება მან მას შემდეგ მიიღო, რაც პენიტენციურმა სამსახურმა ციხიდან მორიგი კადრები გაავრცელა. იქ ჩანს, რომ ექსპრეზიდენტი გლდანის სამკურნალო დაწესებულებაში ძალის გამოყენებით გადაჰყავთ. მოგვიანებით, პენიტენციურმა კვლავ გამოაქვეყნა ვიდეო, რომელშიც ექსპრეზიდენტი უარს აცხადებს სასწრაფო დახმარების მანქანის დატოვებაზე და რუსთავის ციხეში დაბრუნებას ითხოვს.

პენიტენციურმა სამსახურმა პირველად 6 ნოემბერს გაავრცელა ვიდეო, სადაც, მათი მტკიცებით, სააკაშვილი "საკვებს იღებს". აღნიშნული პენიტენციურმა "მაღალი საჯარო ინტერესით" ახსნა. პარალელურად, განცხადება გააკეთა სახალხო დამცველმა, რომელმაც მიღებულ ინფორმაციაზე დაყრდნობით თქვა, რომ სააკაშვილი პირველი ოქტომბრის შემდეგ უწყვეტად შიმშილობდა და ის, რასაც იღებდა, იყო არა საკვები, არამედ სამედიცინო დანიშნულებით გამოწერილი საკვები დანამატები და მედიკამენტები. კადრების გავრცელების შემდეგ, სააკაშვილმა შეწყვიტა აღნიშნული საკვები დანამატებისა და წამლების მიღება, უარი თქვა ტესტების ჩატარებაზეც.

8 ნოემბერს სააკაშვილი, მისი და მისი ადვოკატების სურვილის საწინააღმდეგოდ, გლდანის ციხის საავადმყოფოში გადაიყვანეს. ეს ინფორმაცია პენიტენციურმა სამსახურმა ერთი საათის შემდეგ დაადასტურა — მას შემდეგ, რაც რუსთავის ციხიდან აფრენილი ვერტმფრენი გლდანის ციხის თავზე გამოჩნდა. მოგვიანებით, სახალხო დამცველმა, ნინო ლომჯარიამ განაცხადა, რომ როგორც სააკაშვილს უთხრეს, ის სამოქალაქო კლინიკაში გადაჰყავდათ და მხოლოდ ამიტომ დათანხმდა შეთავაზებას. პარალელურად, პენიტენიცურმა გაავრცელა მორიგი კადრები, სადაც ჩანს, რომ სააკაშვილი ნივთებს ალაგებს. ამ კადრებზე დაყრდნობით უწყება ამტკიცებდა, რომ სააკაშვილს სასჯელაღსრულების დაწესებულება მისი ნების საწინააღმდეგოდ არ დაუტოვებია.

პატიმრის პირადი ინფორმაციის დაცვა რომ აუცილებელია, ამაზე განცხადება სახელმწიფო ინსპექტორის სამსახურმა ჯერ კიდევ 5 ნოემბერს, კადრების გავრცელებამდე გააკეთა. იქ აღნიშნული იყო, რომ მნიშვნელოვანია დაცული იყოს მოშიმშილე პატიმრის პირადი ცხოვრების ხელშეუხებლობა, მისი პერსონალური, განსაკუთრებით კი, ჯანმრთელობის მდგომარეობის შესახებ მონაცემები. მეორე დღეს, კადრების გავრცელების შემდეგ, მათ კადრების მოპოვებისა და გავრცელების კანონიერების შესწავლა დაიწყეს.