მიხეილ სააკაშვილის ადვოკატის, ნიკა გვარამიას განცხადებით, ექსპრეზიდენტის მიმართ მთავარი ძალადობის კადრები პენიტენცური სამსახურის მიერ გავრცელებული ვიდეო ჩანაწერიდან ამოჭრილია. ამის შესახებ მან გლდანის ციხის სამკურნალო დაწესებულებასთან ისაუბრა.

"ეს კადრები არ არის უწყვეტი კადრები, მთავარი ძალადობის ნაწილი მიხეილ სააკაშვილის წინააღმდეგ, არის ამოჭრილი. მიუხედავად ყველაფრისა, რაც ჩვენ ვნახეთ, ამის აღწერა შეიძლება ყველაზე ცნობილი ფრაზით: "არწივი ვნახე დაჭრილი ყვავ-ყორნებს ეომებოდა" და ეს პარადიგმა მარტო ჩემს თავში კი არ გაცოცხლდა, ყველა ქართველში გაცოცხლდა, მათ შორის, თქვენს მომხრეებში — ქართულ ოცნებას მივმართავ. ეს პარადიგმა ძალიან მძლავრია. არწივი არის მიხეილ სააკაშვილი. პირველად ვიტყვი ჩემს ცხოვრებაში ჩემს პოზიციას იმაზე, თუ როგორ უნდა გაგრძელდეს ეს ყველაფერი. მიხეილ სააკაშვილი არის ამ სახელმწიფოს დამფუძნებელი, სააკაშვილმა თავისი შიმშილობით ეს სახელმწიფო კვლავ გააღვიძა.

ეს კადრები, რაც გამოქვეყნდა, ჩვენ უნდა ვაცნობიერებდეთ, რომ მიზნად ისახავს მიხეილ სააკაშვილის სიკვდილს, იმიტომ, რომ როგორც კი ჩვენ საუბარს ვიწყებთ სტაბილიზაციაზე და მისი გადარჩენის გზებზე, იწყება დეზინფორმაცია, რომ ის ჭამს, მერე აქვეყნებ კადრებს, სადაც, თითქოს, უკვე ფაფას კი არა მწვადებს ჭამს. რა თქმა უნდა, ამაზე ყოველთვის უკურეაქცია აქვს მძევალს, მიხეილ სააკაშვილს და კიდევ უფრო მძიმდება მისი მდგომარეობა", — აცხადებს ის.

მისივე თქმით, ეს კადრები მიზნად ისახავს არა მხოლოდ მიხეილ სააკაშვილის სიკვდილს, არამედ ექსპრეზიდენტის სიკვიდლის შემდეგ, ამ ქვეყნის განადგურებას და იმას, რომ "ერთ მშვენიერ დილას ყველამ რუსული ტანკებით სავსე თბილისში გავიღვიძოთ".

"ამიტომ, მე მგონია, რომ მიხეილ სააკაშვილმა, როგორც ამ სახელმწიფოს დამფუძნებელმა კვლავ უნდა დააფუძნოს ეს სახელმწიფო და გადაარჩინოს რუსეთის მიერ დაპყრობისგან. ეს ჩემი პოზიციაა, რასაც მე მიშას ვეტყვი აუცილებლად. შიმშილობა იყო ინსტრუმენტი და როცა ეს ინსტრუმენტი მუშაობს, ის მუშაობს. მაგრამ თუ ბრძოლის ეს ფორმა უკვე მიშას საწინააღმდეგოდ იმუშავებს და ქვეყნის, მე ვფიქრობ, რომ დროა, ჩვენ უნდა დავიწყოთ მუშაობა ამ ინსტრუმენტის გადახედვაზე, ჩანაცვლებაზე ამ ფორმის", — აღნიშნა გვარამიამ.

პენიტენციურმა სამსახურმა გამოაქვეყნა კადრები, რომლებშიც ჩანს, რომ მიხეილ სააკაშვილი გლდანის ციხის სამკურნალო დაწესებულებაში ძალის გამოყენებით გადაჰყავთ. კადრების მიხედვით, სააკაშვილი სასწრაფო დახმარების მანქანიდან იძულებით გამოიყვანეს, ძალით შეიყვანეს შენობის დერეფნებსა და ლიფტშიც, კერძოდ, ფეხებსა და ხელებში ჩაავლეს ხელი, რა დროსაც ტანსაცმელი თითქმის გახდილი აქვს. ექსპრეზიდენტი ციხის საავადმყოფოს პალატაში უკვე წელზევით შიშველი შეიყავნეს და პირდაპირ იატაკზე დასვეს.

მისდამი ასეთ მოპყრობაზე სააკაშვილმა იმ დღესვე ისაუბრა, როცა გლდანის ციხეში გადაიყვანეს. ის აცხადებდა, რომ წინააღმდეგობის მიუხედავად, იძულებით შეიყვანეს მე-18 დაწესებულებაში, კრიმინალების გინების ქვეშ გაათრიეს მიწაზე, ჩაარტყეს კისერში, ათრიეს თმებით, რა დროსაც წინააღმდეგობა გაუწია. მისი ადვოკატი, ნიკა გვარამია კი ამბობდა, რომ პატიმრები, ე.წ. შუმოკით ფანჯრებთან სპეციალურად დაახვედრეს და სააკაშვილი აგინებინეს.

ექსპრეზიდენტის იძულებით შეყვანის ვიდეოს გავრცელებამდე იუსტიციის მინისტრმა განაცხადა, რომ კადრებს იმის უარსაყოფად გამოაქვეყნებდნენ, რასაც სააკაშვილის ადვოკატი, ნიკა გვარამია ამტკიცებდა. მისი თქმით, გვარამიას განცხადება, დაწესებულებაში სააკაშვილის იძულებით შეყვანისა და იმის შესახებ, რომ სხვა პატიმრებს წინასწარ ჰქონდათ ინფორმაცია, სიცრუეა და ამ სიცრუეს "სულ რამდენიმე წამში" ამხელდნენ.