კარანტინში სახლიდან მუშაობისას თუ რამე გამოწვევა შეგხვდა, პირველ რიგში ალბათ ბავშვები, რომლებიც არაფრად დაგიდევენ ძლივს გასწორებულ კამერას და უაპელაციოდ გაწყვეტინებენ თათბირს ან მნიშვნელოვან ზარს.

ეს ამბავი ყველასთვის იმდენად ნაცნობია, რომ ახალი ზელანდიის პრემიერმინისტრი, ჯასინდა არდერნი, არც კი აღელვებულა, როცა პირდაპირი ჩართვის დროს თავისი სამი წლის შვილი კითხვით მიეჭრა.

"წესით ლოგინში უნდა იყო, საყვარელო", — დაყვავებით უპასუხა ჯასინდამ შვილს, რომელიც დაძინებული ეგულებოდა, — "ორ წუთში მოვალ და დაგხედავ, კარგი? ბებო დაგაძინებს".

არდერნმა, რომელიც ფეისბუქლაივში ეპიდსიტუაციაზე საუბრობდა, მაყურებლებს მოუბოდიშა და სასხვათაშორისოდ იკითხა, დაძინების შემდეგ ბავშვები თქვენც თუ გაგირბიან სამი-ოთხჯერ საწოლიდანო. იქვე დასძინა, კიდევ კარგი, დედაჩემი აქ არის და დამეხმარებაო. თუმცა...

"რამდენი ხანი გრძელდება?", — მალე ისევ გაისმა 3 წლის ნევეს ხმა, რომელიც დედის დაპირების შეუსრულებლობის გამო აშკარად უკმაყოფილო ჩანდა.

"ბოდიში, საყვარელო, დიდხანს გრძელდება კი", — მიხვდა არდერნიც და ნაჩქარევად გადაწყვიტა დამშვიდობება და ლაივჩართვის გათიშვა. იმედიც გამოთქვა, მომავალში უფრო ხანგრძლივად და შეწყვეტინების გარეშე შევძლებ ჩართვასო.

ახალზელანდიელი პოლიტიკოსებისთვის უდროო დროს ოჯახის წევრის მიერ მნიშვნელოვანი ჩართვის შეწყვეტინება უცხო ნამდვილად არაა. რამდენიმე თვის წინ, როცა ქვეყნის საზოგადოებრივი განვითარების მინისტრი კარმელ სეპულონი ერთ-ერთ სატელევიზიო გადაცემაში ერთვებოდა, თავისი შვილი მხიარულად შეიჭრა მის ოთახში და უჩვეულოფორმიანი სტაფილოს კადრში ჩვენება დაიწყო.

თუმცა, ბავშვების მიერ პირდაპირი ჩართვის შეწყვეტინებაში რომ ჩემპიონატი იმართებოდეს, ამას, ეჭვგარეშეა, პროფესორ რობერტ კელის შვილები მოიგებდნენ. კელი 2017 წელს BBC-ის პირდაპირ ეთერში საუბრობდა, როცა მის კაბინეტში ჯერ უფროსი შვილი შეიჭრა ცეკვა-ცეკვით, მერე კი მას ძმაც მიჰყვა ჭოჭიალათი.