საპატრიარქო ახალქალაქის, კუმურდოსა და კარის მიტროპოლიტი ნიკოლოზის განცხადებაზე მიხეილ სააკაშვილის შიმშილობასთან დაკავშირებით ამბობს, რომ პოლიტიკური მოტივებით განპირობებული შიმშილობის გაიგივება 40-დღიან მშრალ მარხვასთან მარხვის არსის დაკნინებაა.

"საეკლესიო მარხვა არის სინანულის აქტი, რომელიც აღესრულება ცოდვათა მონანიებისა და შენდობის სასოებით ... და საერთო არაფერი აქვს უსამართლო მოპყრობის მოტივით განხორცილებულ ისეთ საპროტესტო ფორმასთან, სადაც მოშიმშილე შესაძლო მძიმე შედეგის პასუხისმგებლობას სხვას აკისრებს.

ამიტომაც, პოლიტიკური მოტივებით განპირობებული შიმშილობის (მითუმეტეს, რაციონი არასამარხოცაა) გაიგივება 40 დღიან მშრალ მარხვასთან, მარხვის არსის დაკნინებაა", — აცხადებს საპატრიარქო.

ისინი ამბობენ, რომ მეუფე ნიკოლოზმა აღნიშნა, მიხეილ სააკაშვილმა 40-დღიანი მშრალი მარხვით დიდი მსხვერპლი გაიღო ქვეყნის გაძლიერებისთვის, ექსპრეზიდენტისა და მისი მომხრეებისგან კი ყველა ინფორმირებულია, რომ იგი პროტესტის ნიშნად შიმშილობს.

"სამწუხაროდ, ამა წლის 8 ნოემბერს გაკეთებული კომენტარითაც მეუფე ნიკოლოზმა მოქალაქეთა სამართლიანი უკმაყოფილება გამოიწვია, პირველ რიგში, ქრისტიანული სწავლების კონტექსტში მოხმობილი შეუსაბამო შედარებებით;

მან ხაზგასმით აღნიშნა ისიც, რომ ბატონმა მიხეილ სააკაშვილმა 40 დღე მშრალად იმარხულა, რითაც დიდი მსხვერპლი გაიღო ქვეყნის გაძლიერებისათვის და იმისათვის, რომ სიძულვილის ენა დავივიწყოთ. ამ ღვაწლით კი ყველაფერი შეინანა.

პრეზიდენტისა და მისი მომხრეებისაგან კი ყველა ინფორმირებულია, რომ იგი შიმშილობს პროტესტის ნიშნად, უსამართლოდ მიიჩნევს მის დაკავებას და თავს დამნაშავედ არ სცნობს", — აღნიშნულია განცხადებაში.

მიტროპოლიტმა ნიკოლოზ ფაჩუაშვილმა ექსპრეზიდენტ მიხეილ სააკაშვილთან შეხვედრის შემდეგ 8 ნოემბერს განაცხადა, რომ სააკაშვილი აზიარა და მისგან აღსარება ჩაიბარა. ფაჩუაშვილის თქმით, ეს არის ისტორიული მოვლენა. ამასთანავე, მან აღნიშნა, რომ ზიარების შესახებ პატრიარქს შეუთანხმდა და ეს მისი კურთხევით მოხდა.