გიგი უგულავას ექსპრეზიდენტ მიხეილ სააკაშვილის სასამართლო სხდომა დაატოვებინეს. პროცესზე დაცვის მხარე ბრალდებულის სასამართლო დარბაზში გადაყვანას ითხოვდა, რასაც უგულავასა და მოსამართლეს შორის სიტყვიერი დაპირისპირება მოჰყვა.

"რა თქმა უნდა, პოლიტიკური დაკვეთა არის. იმიტომ რომ შესციცინებდნენ ჯარჯი პროკურორი რასაც ეტყოდა, იმას ლამაზად აფორმებდნენ. სამარცხვინოა, რასაც ვუყურებ, გულისამრევია. ეს სასამართლო არ არის, ეს არის ჩვეულებრივი "ტროიკა", — განაცხადა უგულავამ დარბაზის დატოვების შემდეგ.

თბილისის საქალაქო სასამართლოში ექსპრეზიდენტ მიხეილ სააკაშვილის სასამართლო პროცესი მიმდინარეობს.

პენიტენციურმა სამსახურმა მიხეილ სააკაშვილს სასამართლო სხდომაზე დასწრებაზე უარი უთხრა. უწყება ამის მიზეზად იმას ასახელებს, რომ შესაძლოა სასამართლო დარბაზში ესკორტირებისას მოხდეს "დესტრუქციული ხასიათის" ქმედება. მათივე თქმით, სააკაშვილს შეწყვეტილი აქვს მკურნალობის არსებითი ნაწილი, სასამართლო პროცესზე გაყვანა და დასწრება კი წარმოადგენს დამატებით რისკს მისი ჯანმრთელობისთვის. თუმცა, გუშინ მისმა ექიმმა აღნიშნა, რომ ის პროცესზე დასწრებას შეძლებს.

დღეს სხდომაზე პროკურატურამ შუამდგომლობა დააყენა, რომ პენიტენციური დაწესებულების გადაწყვეტილების გამო, სხდომა ციხეში ჩატარდეს ან სააკაშვილი დისტანციურად ჩართონ. ექსპრეზიდენტის ადვოკატები კი მოითხოვენ სააკაშვილი პროცესს სასამართლო დარბაზში დაესწროს.