ჯანდაცვის სამინისტროსთან გამართულ აქციაზე სამოქალაქო აქტივისტებს აკავებენ. დაკავების მიზეზი ჯერჯერობით უცნობია.

On.ge აღნიშნულზე დაუკავშირდა შინაგან საქმეთა სამინისტროს და ინფორმაციას მოწოდებისთანავე შემოგთავაზებთ.

ყოფილი პრეზიდენტის მიხეილ სააკაშვილის სამოქალაქო კლინიკაში გადაყვანის მოთხოვნით 3 სხვადასხვა ადგილას აქცია იმართება. აქტივისტები ჯანდაცვისა და იუსტიციის სამინისტროებთან, ასევე, სახელმწიფო უსაფრთხოების სამსახურის შენობასთან შეიკრიბნენ.

დღესვე იგეგმება კიდევ ერთი აქცია, თუმცა ნაციონალური მოძრაობის თავმჯდომარემ, ნიკა მელიამ ადგილი არ დაასახელა.

მისივე თქმით, თუ ექსპრეზიდენტის, მიხეილ სააკაშვილის პროცესი გაიმართება ისე, როგორც დაგეგმილია, მაშინ 11-საათიანი აქციების შემდეგ, საქალაქო სასამართლოსთანაც შეიკრიბებიან.

ექსპრეზიდენტი მიხეილ სააკაშვილი მისი და მისი ადვოკატების სურვილის საწინააღმდეგოდ რუსთავის N12 პენიტენციური დაწესებულებიდან გლდანის მე-18 დაწესებულების საავადმყოფოში 8 ნოემბერს გადაიყვანეს.