ადამიანის უფლებათა სახლების ფონდი და თბილისის ადამიანის უფლებათა სახლი საქართველოს ხელისუფლებას მოშიმშილე ელენე ხოშტარიასთან დიალოგის დაუყოვნებლივ დაწყებისკენ მოუწოდებს. მათი განცხადებით, საქართველოს ხელისუფლებამ გამოხატვისა და შეკრების თავისუფლებების დასაცავად უნდა იმოქმედოს და არსებითად ხელი შეუწყოს ადამიანის უფლებათა დამცველების, მათ შორის, ელენე ხოშტარიას ამ უფლებით სარგებლობის შესაძლებლობას.

"ელენე ხოშტარია არის პოლიტიკური ლიდერი, რომელიც აქტიურად იცავს ადამიანის უფლებებს და ხშირად ითავსებს უფლებადამცველის ფუნქციასაც. ჩვენ მის მიერ შერჩეული პროტესტის ამგვარ ფორმას უფლებადაცვით საქმიანობად მოვიაზრებთ. ასეთი მწვავე პროტესტით ელენე ხოშტარია ხაზს უსვამს შეკრებისა და გამოხატვის თავისუფლებებისთვის არსებული სივრცის შეზღუდვის რეალურ შედეგებს: ვინც მშვიდობიან პროტესტს ირჩევს, მას აღარ რჩება სხვა გზა, გარდა ისეთი უკიდურესი ზომების მიღებისა, როგორიცაა შიმშილობა", — ნათქვამია განცხადებაში.

საერთაშორისო ორგანიზაცია ხელისუფლებას მოუწოდებს:

  • უზრუნველყოს გამოხატვისა და შეკრების თავისუფლებით სრულად სარგებლობის შესაძლებლობა;
  • შექმნას ადამიანის უფლებათა დამცველებისთვის უსაფრთხო და საიმედო სივრცე ქვეყანაში;
  • უზრუნველყოს ყველა იმ ადამიანის უსაფრთხოება და ჯანმრთელობა, ვინც პროტესტის სხვადასხვა ფორმას, მათ შორის, შიმშილობას მიმართავს;
  • დაუყოვნებლივ წამოიწყოს დიალოგი ელენე ხოშტარიასთან, მის მოთხოვნებთან დაკავშირებით.

ელენე ხოშტარია საკანონდებლო ორგანოში მე-7 დღეა შიმშილობს. მისი მთავარი მოთხოვნა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანაა. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

დღეს, 9 ნოემბერს მან განაცხადა, თუ მის სიცოცხლეს საფრთხე შეექმნება, მედიკამენტებს მიიღებს, თუმცა შიმშილობის შეწყვეტას არც კი განიხილავს.