დროას ლიდერის, ელენე ხოშტარიას განცხადებით, იმ შემთხვევაში, თუ მის სასიცოცხლო პარამეტრებს საფრთხე დაემუქრება, მედიკამენტებს მიიღებს, თუმცა მისი თქმით, შიმშილობის შეწყვეტას მისი მოთხოვნის შესრულებამდე არ აპირებს.

"მე ვთქვი თავიდანვე, რომ მე ვიშიმშილებ, სანამ მისი სიცოცხლის საფრთხე არ მოიხსნება. დღეს მისი ჯანმრთელობისა და უსაფრთხოების საფრთხე არის კიდევ უფრო დიდი, ვიდრე იყო მანამდე. ამიტომ, რა თქმა უნდა, მე არც კი განვიხილავ შიმშილობის შეწყვეტას, მე ვაგრძელებ შიმშილობას.

ერთადერთი, რადგან პოლიტიკური კონტექსტი შეიცვალა, თუ ჩემი სიცოცხლის პარამეტრებს შეექმნება საფრთხე, მხოლოდ იმ შემთხვევაში მივიღებ გარკვეულ მედიკამენტებს. თუ მე, ჩემი ნდობით აღჭურვილი ექიმი მეტყვის, რომ ეს არის სიკვდილის ზღვარი, იმ შემთხვევაში მივიღებ წამლებს. იმიტომ, რომ მე არ ვაპირებ დანებებას, სიკვდილს და არც ბრძოლის შეწყვეტას, მე ვაპირებ გამარჯვებას ამ ბრძოლის გზით", — ამბობს ხოშტარია.

ელენე ხოშტარიამ შიმშილობა 7 დღის წინ დაიწყო. მისი მთავარი მოთხოვნაა, ექსპრეზიდენტი მიხეილ სააკაშვილი სამოქალაქო კლინიკაში გადაიყვანონ. ექიმის ინფორმაციით, ის იღებს მხოლოდ სითხეს და უარს ამბობს, ვიტამინებსა და სხვა მედიკამენტებზე.

დროას ლიდერი 7 და 8 ნოემბერს შეუძლოდ გახდა და სასწრაფო დახმარების გამოძახება გახდა საჭირო. სასწრაფოს ექიმის ინფორმაციით, მას დაუვარდა წნევა და დაკარგა გონება. მისივე თქმით, სტაბილურადაა და უარს ამბობს ჰოსპიტალიზაციაზე.

მას შემდეგ, რაც ექსპრეზიდენტი მიხეილ სააკაშვილი გლდანის ციხის კლინიკაში გადაიყვანეს, პარტია დროას წევრებმა განაცხადეს, რომ ხოშტარია შიმშილობას მანამდე გააგრძელებს, სანამ დადასტურებული და უტყუარი ინფორმაცია არ ექნებათ იმის შესახებ, რომ სააკაშვილის სიცოცხლეს საფრთხე არ ემუქრება.