ლიტვის დედაქალაქის მერი ცენტრალური ევროპის უნივერსიტეტის ხელმძღვანელს ვილნიუსში გადასვლას სთავაზობს. რეგამიუს შიმაშიუსმა უნივერსიტეტის პრეზიდენტსა და რექტორს, მაიკლ იგნატიეფს წერილი გაუგზავნა და მოლაპარაკებებზე ვილნიუსში მიიწვია.

ფოტო: Remigijus Šimašius / Facebook

"მინდა შემოგთავაზოთ შეუერთდეთ ჩვენს აქტიურ საერთაშორისო საზოგადოებას და გაიზიაროთ ჩვენი ქალაქის ღია და მეგობრული რეგულირებული გარემო.

მთელი გულით გეპატიჟებით ვილნიუსში, რომ განვიხილოთ ცენტრალური ევროპის უნივერსიტეტის ჩვენს ქალაქში გადმოტანის შესაძლებლობა.

ვილნიუსი ძალიან ინოვაციური და პროგრესული ქალაქია, განსაკუთრებული კულტურული მრავალფეროვნებით, ცოცხალი და აქტიური ატმოსფეროთი, რომელსაც ახალგაზრდა ლიტველები ქმნიან." - წერია წერილში.

უნგრეთის ხელისუფლება აპირებს გაამკაცროს რეგულაციები, რომელთა მიხედვით, ევროკავშირის გარეთ რეგისტრირებული ინსტიტუტებისთვის უნგრეთში დიპლომებისა და აკადემიური ხარისხის გაცემა გართულდება. უნგრული მედიის ინფორმაციით, აშკარაა, რომ პრემიერ-მინისტრ ვიქტორ ორბანის ხელისუფლებას კონკრეტულად ცენტრალური ევროპის უნივერსიტეტი, ჯორჯ სოროსი და მისი ფონდი ღია საზოგადოება ჰყავს მიზანში ამოღებული.