ზურაბ ჯაფარიძე და გირჩი — მეტი თავისუფლების რამდენიმე წევრი სუს-ის ეზოს დანაგვიანების გამო დააჯარიმეს. აქციაზე მყოფი პირების უმეტესობამ პოლიციას უთხრა, რომ პირადობა თან არ აქვთ, ამიტომ ვიდეოკადრებიდან მოახდინონ იდენტიფიცირება და ისე დააჯარიმონ, ნაწილს კი საჯარიმო ქვითრები იქვე მისცეს.

როგორც პოლიციამ ჯაფარიძეს განუმარტა 2 კილოგრამამდე საყოფაცხოვრებო ნაგვის დაყრისთვის 80-ლარიანი ჯარიმა გამოუწერეს. მისი თქმით, გადახდას არ აპირებს და ჯარიმა ხალხის დაშინების გზაა.

"ჩემი აზრით, მაინც უნდა გააპროტესტონ და 80-მა ლარმა არ შეგაშინოთ. შეგიძლიათ ნიღაბი გაიკეთოთ, ან ქუდი ჩამოიფაროთ, მოხვიდეთ, ნაგავი დაყაროთ და წახვიდეთ. შეგიძლიათ ეს გააკეთოთ ჯგუფურად. რაც მეტი გააკეთებთ, მით უფრო უკეთ მოუშლით ნერვებს და უფრო მოვახდენთ ამათ პარალიზებას", — განაცხადა მან.

გირჩი — მეტი თავისუფლების წევრებმა სუს-ის შენობის წინ ნაგავი დაყარეს და ეზოში ქაღალდის თვითმფრინავები გაუშვეს. ჯაფარიძის თქმით, თვითმფრინავებს აწერია, რომ რევოლუციას ითხოვენ. მისივე თქმით, სახელწმიფო უსაფრთხოების სამსახურთან მივიდნენ, რადგან ის არის მთავარი მორდორი და უწყება, რომელიც არჩევნებს აყალბებს.

როგორც ჯაფარიძე განმარტავს, ტრადიციული პროტესტის ფორმებს არ ეთანხმებიან და მიაჩნიათ, რომ ახლა საჭიროა ისეთი ფორმით მოქმედება, რაც გააღიზიანებთ და ნერვებს მოუშლით.

"დღესაც ასეთი აქცია არის წესით, რომელმაც უნდა გააღიზიანოს. საყოფაცხოვრებო ნაგავი 30-მდე ადამიანმა წამოვიღეთ, არ ჩავყარეთ ურნებში, მოვიტანეთ და დავყარეთ სუს-ის შესასვლელთან, რადგან ეს ადგილი მგონია მთავარი ადგილი ბოროტების. არაფრის გაპროტესტებას არ აქვს აზრი ცესკოსთან და ასეთ სტრუქტურებთან, აქედან იმართება ეს ქვეყანა", — განაცხადა მან.

ჯაფარიძის თქმით, მსგავს პროტესტს აზრი ექნება, თუ ბევრი ადამიანი ჩაერთვება. მისივე თქმით, ამის გაკეთება ყველას შეუძლია, რადგან სახლში ნაგავი ყველას აქვს. ჯაფარიძემ აღნიშნა ისიც, რომ ფიქრობენ პროტესტის ეს ფორმა გაიმეორონ და ნაგვის მოცულობა გაზარდონ.