პრეზიდენტი სალომე ზურაბიშვილი ფიქრობს, რომ დიპლომატები უფრო ყურადღებით უნდა იყვნენ და უფრო სწრაფი რეაგირება ჰქონდეთ მაშინ, როცა ქვეყანაზე "ბევრი რამე იწერება" და "არის სიცრუე". შენიშვნა მან დიპლომატებს დიპლომატიის დღეზე სიტყვით გამოსვლიას მისცა.

"ძალიან ბევრი რამე იწერება საქართველოზე. ვიცით, რომ სხვადასხვა კუთხით ძალიან ბევრი ძალები ამაზე მუშაობენ. მე მგონი ელჩები უფრო ყურადღებით უნდა იყვნენ, პოლიტიკურად შეიძლება ბევრ რამეს ვერ უპასუხონ — იმიტომ, რომ ეს მათი საქმე არ არის და უნდა იყვნენ წარმომადგენლები ერთიანი საქართველოსი და არა რომელიმე პარტიის, თუ რომელიმე მხარის. მაგრამ, როცა იწერება რამე, რაც არის სიცრუე და სჭირდება ამას დაზუსტება, პასუხი, უფრო სწრაფი რეაგირება გვევალება", — განაცხადა მან.

პრეზიდენტს არ დაუკონკრეტებია, ვის დაწერილს ან რას გულისხმობდა — დეზინფორმაციულ მასალებს ოკუპანტი ქვეყნიდან, თუ კრიტიკულ ტვიტებსა და წერილებს ევროპარლამენტარებისა და კონგრესმენებისგან. მან მხოლოდ ის თქვა, რომ რეაგირება საჭიროა, რადგან ჩვენ დიპლომატიაზე დამოკიდებულები ვართ.

"იმიტომ, რომ, კიდევ ერთხელ, ჩვენთვის დიპლომატია არის გადარჩენის ფორმა. სხვა, დიდი ქვეყნებისთვის, ალბათ, დიპლომატია არის რაღაც უფრო ლუქსის ნაწილი და ნაკლებად არიან დამოკიდებული ბოლომდე ამ ერთ ინსტრუმენტზე. ჩვენ, პრაქტიკულად, ძალიან დამოკიდებული ვართ და ყველაფერი გადის, როგორც თქვენც ბრძანეთ, ამ ხაზზე", — განაცხადა მან.

პრეზიდენტის გამოსვლის შემდეგ ტრიბუნაზე ავიდა საგარეო საქმეთა მინისტრი დავით ზალკალიანი, რომელმაც განაცხადა, რომ სწორედ საელჩოებისა და დიპლომატიური მისიების პასუხისმგებლობაა, რაც შეიძლება სწრაფად მოხდეს ყვეალფერზე რეაგირება.

"ჩვენი ქვეყნისთვის, ჩვენნაირი პატარა ქვეყნისთვის, ვისაც შეზღუდული რესურსები აქვს, ბუნებრივია, ხარისხი და სწრაფი რეაგირება არის ერთ-ერთი მნიშვნელოვანი და გადამწყვეტი", — განაცხადა მან.

კრიტიკული განცხადებების შემდეგ, სამთავრობო გუნდს არაერთხელ უთქვამს, რომ საერთაშორისო პარტნიორებს ოპოზიციის ლობირების გამო არასწორი ინფორმაცია აქვთ და სწორედ ამიტომ აკრიტიკებენ.