უილ სმიტმა საზოგადოებას მემუარებში, რომელიც მალე გამოიცემა, საკუთარი ცხოვრების ყველაზე რთული მონაკვეთების შესახებ მოუთხრო, რომელთა შორის ოჯახში ძალადობა და მამასთან პრობლემებია. მან ის მოვლენები გაიხსენა, რომლებმაც ერთ დროს საკუთარი მამის მოკვლაც კი აფიქრებინა. მემუარებიდან შესაბამისი ნაწყვეტი გამოცემა People-მა მოიპოვა.

უილ სმიტს მამასთან რთული ურთიერთობა ჰქონდა. ის მამას "მოძალადეს" უწოდებს, თუმცა იმასაც აღნიშნავს, რომ შვილისადმი საკმაოდ ყურადღებიანი იყო. ამის გამო მამასთან ახლო ურთიერთობა ჰქონდა, თუმცა უარყოფითი ემოციები არსად გამქრალა.

"მამაჩემი მოძალადე იყო, თუმცა ნებისმიერ თამაშს, სპექტაკლსა თუ კონცერტს ესწრებოდა. ის ალკოჰოლზე დამოკიდებული იყო, თუმცა ჩემი თითოეული ფილმის თითოეულ პრემიერაზე ფხიზელი მოდიოდა", — იხსენებს მსახიობი.

უილ სმიტმა 9 წლის ასაკში თავს გადამხდარი შემთხვევაც გაიხსენა. მისი თქმით, მამამისმა დედამისს თავში ისე ძლიერად ჩაარტყა, რომ დედა დაეცა და სისხლი გადმოაფურთხა. ამ შემთხვევამ მსახიობზე უდიდესი გავლენა მოახდინა და მთელი ცხოვრების განმავლობაში, ყველაზე წარმატებულ მომენტებშიც კი ახსოვდა, რომ იმ დღეს მამას ვერ შეეწინააღმდეგა და დედის დაცვა ვერ შეძლო.

"ის, ვინც უილ სმიტი გგონიათ — უცხოპლანეტელების გამანადგურებელი მთავარი გმირი, წარმატებული კინოვარსკვლავი, ეს უბრალო ფასადია — ფრთხილად დამუშავებული, ჩემი თავის დასაცავად, სამყაროსგან დასამალად, ლაჩარი ადამიანის დასამალად შექმნილი პერსონაჟი", — წერს მსახიობი.

მისი თქმით, წლების განმავლობაში დაგროვებულმა ბრაზმა და შიშმა ერთ საღამოს იხეთქა, როდესაც ეტლში მჯდომი მამა საპირფარეშოსკენ მიჰყავდა. ამ დროს მისი გონება უსიამოვნო ფიქრებმა მოიცვა.

"ერთ ღამეს, როდესაც ეტლში მჯდომი მამაჩემი მისი ოთახიდან საპირფარეშოსკენ მიმყავდა, ჩემში წყვდიადმა შემოაღწია. იმ ორ ოთახს შორის გზა კიბის თავთან გადიოდა. ბავშვობაში საკუთარ თავს ყოველთვის ვეუბნებოდი, რომ ერთ დღესაც დედაჩემის გამო შურს ვიძიებდი. მაშინ, როცა საკმარისად დიდი და ძლიერი ვიქნებოდი, მაშინ, როცა ლაჩარი აღარ ვიქნებოდი, მას მოვკლავდი.

კიბის თავთან შევჩერდი. მისი გადაგდება და მარტივად გამოძრომა შემეძლო. მე ხომ უილ სმიტი ვარ. არავინ დაიჯერებს, რომ მამაჩემი ძალით მოვკალი. მსოფლიოში ერთ-ერთი საუკეთესო მსახიობი ვარ. 911-ში ჩემი ზარი ოსკარის ღირსი იქნება", — იხსენებს უილ სმიტი.

მსახიობის თქმით, წლების განმავლობაში დაგროვებულმა უარყოფითმა ემოციებმა მალევე გაუარა და მამასთან ერთად გზა მშვიდად გააგრძელა.

აღსანიშნავია, რომ უილ სმიტს მამასთან ახლო ურთიერთობა მის გარდაცვალებამდე — 2016 წლამდე ჰქონდა. მსახიობის მშობლები ერთმანეთს მაშინ დაშორდნენ, როდესაც უილი ჯერ კიდევ თინეიჯერი იყო.