ცნობილი ქალი საოცრება ამჯერად დისნეის სამყაროში გადაინაცვლებს და ფიფქიას თავიდან მოსაშორებლად მზაკვრულ გეგმებს შეიმუშავებს. გამოცემა Deadline-ის მიხედვით, ფიფქიას შესახებ დისნეის ახალ ფილმში ბოროტი დედინაცვლის როლს გალ გადოტი მოირგებს.

გალ გადოტი ფილმში ფიფქიას როლის შემსრულებელ რეიჩელ ზეგლერს შეუერთდება, რომელიც როლზე ივნისში დაამტკიცეს. დისნეის მომავალ ფილმს მარკ უები გადაიღებს, რომელიც აქამდე ისეთი ცნობილი ფილმების რეჟისორი იყო, როგორებიცაა The Amazing Spider-Man და 500 Days of Summer. ფიფქიას ახალი ფილმი, სავარაუდოდ, 2022 წელს გამოვა.

ფიფქია და შვიდი ჯუჯა დისნეის პირველი სრულმეტრაჟიანი მულტფილმია, რომელიც 1937 წელს შეიქმნა. თითქმის საუკუნის შემდეგაც უზომოდ პოპულარული ეს ანიმაცია ძმები გრიმების ზღაპარს ეფუძნება.

აღსანიშნავია, რომ ეს პირველი მცდელობა არ იქნება, როცა ამ ამბავს ახალი ფილმის შესაქმნელად იყენებენ: 2012 წელს გამოვიდა Mirror Mirror ჯულია რობერტსისა და ლილი კოლინზის მონაწილეობით და Snow White and the Huntsman შარლიზ ტერონისა და კრისტენ სტიუარტის შესრულებით.

ბოლო წლებში დისნეი აქტიურად მუშაობს თავისი ცნობილი ანიმაციების ხელახლა გაცოცხლებაზე: დაგეგმილია პატარა ქალთევზას, პინოქიოსა და ლილო და სტიჩის ფილმების გადაღებაც.

ამავე თემაზე: