ფოთის აგრარული ბაზრის დირექტორმა, ნოდარ კორსანტიამ ოპოზიციის წარმომადგენელს სცემა და აგინა. მისი თქმით, საქმის გასარჩევად ე.წ. კანონიერ ქურდებთან აპირებს წასვლას.

მანამდე დაპირისპირება იყო მოვაჭრეებსა და დირექტორს შორის. ადგილზე ოპოზიციის წარმომადგენლენი სწორედ მას შემდეგ მივიდნენ, რაც გარემოვაჭრეებმა კორსანტია ზეწოლაში დაადანაშაულეს და თქვეს, რომ ბიზნესმენი მათ ადგილზე თევზის გაყიდვის უფლებას არ აძლევს.

"კორსანტია ყველანაირად ავიწროებს აქ ხალხს, ზოგს იქეთ იჭერს, ზოგს პირობითს აძლევს, ზოგს რას და ზოგს რას. მოგვაქციეთ ყურადღება და ამ კაცისგან გაგვათავისუფლეთ, მოაშორეთ ეს კაცი აქედან, ყველას სული ამოგვაძრო, აქ ვალებში ჩაგვაგდო, ყველა გაჭირვების დღეშია. გლეხმა არ იარსებოს? ყველა თავადი უნდა იყოს, ყველას კერძო საკუთრება უნდა ჰქონდეს? არ გვაქვს ჩვენ მილიონები, ჩვენ გვაქვს კაპიკები და კაპიკებზე ვზივართ", — აცხადებს ერთ-ერთი გარემოვაჭრე TV პირველთან.

კორსანტია ამბობს, რომ მას "ოჯახში შეუვარდნენ", პოლიცია ვერ ეხმარება, ამიტომ ე.წ. კანონიერ ქურდებთან აპირებს წასვლას.

"ოთხჯერ დავურეკე პატრულს, ახლა პირდაპირ ვაფიქსირებ, ახლა წავალ ქურდებთან და გაარჩევენ საქმეს. აბა მეტი რა ვქნა, პოლიცია ვერ აკეთებს, მერია ვერ აკეთებს, 112 ვერ აკეთებს, ოჯახში შემომივარდა ხალხი და ვის მივმართო აბა", — აცხადებს კორსანტია.

ოპოზიციონერი განცხადებით, კორსანტიას სასამართლოში უჩივლებს. მისივე თქმით, ბიზნესმენს ადგილზე მონოპოლია უნდა.

"მე ვუჩივლებ ბაზრის დირექტორს, სასამართლოში შემოვუტან შეურაცხყოფისთვის და გინების გამო, ეს არის არაკაცი და ჰგონია თავი დიდი კაცი, სინამდვილეში არაფერია არაა. თვითონ თევზი მოიტანა, ამათ არ აყენებს და მონოპოლია უნდა ბაზარზე, მეტი არაფერი", — თქვა მან.

On.ge მომხდარის დეტალებისა და იმის გასარკვევად, დაიწყო თუ არა გამოძიება, შინაგან საქმეთა სამინისტროს დაუკავშირდა, პასუხს მიღებისთანავე შემოგთავაზებთ.