ბათუმში, წერეთლის ქუჩაზე მუნიციპალური ინსპექციის წარმომადგენლები გარემოვაჭრეებს ადგილის დატოვებას სთხოვენ, რასაც ხმაური მოჰყვა. როგორც Onge-ს ბათუმის მუნიციპალური ინსპექციაში განუცხადეს, მათ ალტერნატიულ ფართს ბაზარში სთავაზობენ.

გარემოვაჭრეების თქმით, არჩევნებამდე მათთან მსგავსი მოთხოვნით არავინ მოსულა და ამას არჩევნების დასრულებას უკავშირებენ.

"არჩევნების ჩატარებამდე ვიჯექით ლამაზად, არაფერს არ ვაშავებდით, საღამოობით ვალაგებდით, ვრეცხავდით, არავინ არ გვაწუხებდა. არჩევნები დამთავრდა და გარევაჭრობა აგვიკრძალეს", — აცხადებს ერთ-ერთი გარემოვაჭრე.

ბათუმის მუნიციპალური ინსპექციაში ამბობენ, რომ მათი წარმომადგენლების ადგილზე მისვლა გამოიწვია შეტყობინებამ ტერიტორიაზე არსებული ანტისანიტარიის შესახებ და ამის საფუძველზე გადაწყდა გარემოვაჭრეებისთვის საქმიანობის შეწყვეტაზე გაფრთხილება.

"გარევაჭრობა არის კანონსაწინააღმდეგო ქმედება, ხოლო კონკრეტულად ამ შემთხვევაში, გუშინ შემოვიდა შეტყობინება ამ ტერიტორიაზე ანტისანიტარიის შესახებ.ბათუმის მუნიციპალური ინსპექცია ყოველთვის ეტაპობრივად ახორციელებდა, გარევაჭრობის მონიტორინგს არა მხოლოდ თევზეულის გაყიდვასთან დაკავშირებით არამედ სხვა პროდუქტების გამოტანა-გაყიდვასთან მიმართებით. რამდენიმე წლის წინ ამ ქუჩაზე მოხდა გარევაჭრობის აღება, გაიწმინდა ტერიტორია და მას შემდეგ კონტროლდება", — აცხადებენ ისინი.

მათივე თქმით, ალტერნატიული ფართის თაობაზე გარემოვაჭრეებს ბაზრის ტერიტორია ჯერ კიდევ გასულ წელს შესთავაზეს და ასევე, იშუამდგომლეს ბაზრის დირექციასთან, რათა შეღავათიან ფასებში ემუშავათ აღნიშნულ ტერიტორიაზე.