1 დეკემბრიდან რეგიონებში არასაყოფაცხოვრებო მომხმარებლებისთვის, ანუ ბიზნეს-სუბიექტებისთვის ბუნებრივი აირის ტარიფი 1,15 ლარი იქნება. მოქმედი ტარიფი 0,95 ლარია — შესაბამისად, სოკარ ჯორჯია გაზის აბონენტებისთვის გაზის გადასახადი 20 თეთრით გაიზრდება.

სოკარ ჯორჯია გაზი რეგიონებსა და თბილისში, ჰუალინგის დასახლებაში არსებულ აბონენტებს ემსახურება. კომპანიაში ტარიფის ზრდის მიზეზად მომსახურებასთან დაკავშირებული დანახარჯების გაზრდასა და ლარის კურსის ცვლილებას ასახელებენ.

"2021 წლის 1 დეკემბრიდან შპს სოკარ ჯორჯია გაზის საცალო არასაყოფაცხოვრებო მომხმარებლებისთვის 1მ3 ბუნებრივი გაზის ფასი განისაზღვრება 1,15 (ერთი ლარი და თხუთმეტი თეთრი) ლარით დღგ-ს ჩათვლით. არასაყოფაცხოვრებო მომხმარებლებისათვის ბუნებრივი გაზის ფასი შპს სოკარ ჯორჯია გაზის მიერ შენარჩუნებული იყო ბოლო ორნახევარი წლის განმავლობაში.

ფასის კორექტირების აუცილებლობა მომსახურებასთან დაკავშირებული დანახარჯების გაზრდისა და ეროვნული ვალუტის გაცვლითი კურსის ცვლილებითაა განპირობებული", — ნათქვამია კომპანიის განცხადებაში.

სოკარ ჯორჯია გაზში განმარტავენ, რომ ტარიფი უცვლელი დარჩება პურის მწარმოებელი კომპანიებისთვის.