ჰარი სტაილსსა და ორიგინალურ სამოსს რომ განსაკუთრებული ურთიერთობა აქვთ, ეს მომღერლის ფანებს კარგად მოეხსენებათ. შესაბამისად, ყველა განსაკუთრებულად ელოდება ხოლმე, რა ეცმევა სტაილსს ჰელოუინზე. ამჯერად, ბრიტანელმა მუსიკოსმა ჰელოუინი, რომელიც უქმეებს დაემთხვა, ორდღიან წვეულებად აქცია და მას "ჰარიუინი" უწოდა.

შაბათს, ჰელოუინის წინა საღამოს, სტაილსმა და თავისმა ბენდმა ოზის ჯადოქრის პერსონაჟების კოსტიუმებში გამოწყობილებმა შეასრულეს სიმღერა ამავე ფილმიდან Over the Rainbow — თავად ჰარი, რა თქმა უნდა, დოროთის განასახიერებდა.

მეორე საღამოს, ჰელოუინზე, მომღერალმა უკვე არლეკინის კლოუნის კოსტიუმი მოირგო და ბრიტნი სპირსის 2003 წელს გამოშვებული ჰიტი, Toxic, იმღერა. ფანები ფიქრობდნენ, რომ კლოუნის სამოსის ქვეშ ჰარი სხვა კოსტიუმს მალავდა — ერთ-ერთი ფანის ვარაუდით, ეს ბრიტნის კოსტიუმი იქნებოდა — და თუმცაღა ეს ასე არ აღმოჩნდა, მომღერლის სადღესასწაულო ჩაცმულობამ მაინც დიდი ყურადღება მიიქცია. ბევრმა ჰარის გემოვნებაც დაუწუნა, თუმცა, უმეტესობა დადებითი რეაქციებით შეხვდა.

ფოტო: Kevin Mazur / Getty Images

უცნობია, ჰქონდა თუ არა განსაკუთრებული დატვირთვა პერფორმანსს — იყო თუ არა კავშირში ერთმანეთთან ბრიტნის სიმღერა და საჰელოუინო კოსტიუმი.

ოზის ჯადოქრისა და სპირსის ჰიტებთან ერთად, სტაილსმა ორივე საღამოს შეასრულა საკუთარი სიმღერებიც.

მართალია, ღონისძიების ჩამთავრებისას ზოგი მომღერლის ვოკალური ხარვეზებითაც უკმაყოფილო დარჩა, მაგრამ ორდღიანმა ზეიმმა, რომელსაც ჯამში 40 ათასამდე ადამიანი დაესწრო, ფანების დიდი ნაწილი აღფრთოვანებული დატოვა.