ნორვეგიის ხელბურთის ქალთა გუნდმა ამჯერად გამარჯვება არა მოედანზე, არამედ ხელბურთის საერთაშორისო ფედერაციისა და სექსიზმის წინააღმდეგ მოიპოვა. ფედერაციის ახალი წესების მიხედვით, ქალებს ბიკინის ქვედატანით თამაში აღარ მოუწევთ და შეუძლიათ, ტანზე მომდგარი "შორტებით" იასპარეზონ.

გუნდი მსოფლიოს ყურადღების ცენტრში ივლისში მოექცა, როდესაც წევრები მოედანზე სათამაშოდ არა სავალდებულო ბიკინის ქვედატანით, არამედ ტანზე მომდგარი "შორტებით" გამოვიდნენ. "შეუსაბამო" ჩაცმულობის გამო ევროპის ხელბურთის ფედერაციამ თითოეული წევრი €1 500-ით დააჯარიმა.

ამ ფაქტმა ქვეყნის შიგნით და მის ფარგლებს გარეთ საზოგადოების აღშფოთება გამოიწვია. წესებს საზოგადოებამ "სექსისტური" უწოდა. ნორვეგიის ხელბურთის ფედერაციამ განაცხადა, რომ ჯარიმას ფედერაცია თავად გადაიხდიდა. ფედერაციის წარმომადგენელმა აღნიშნა, რომ მნიშვნელოვანია, სპორტსმენეს ისეთი აღჭურვილობა ჰქონდეთ, რომელშიც თავს კომფორტულად იგრძნობენ. ფედერაციამ განაცხადა, რომ ქალების საქციელით ამაყობდა.

ქალებს მხარი ნორვეგიის კულტურისა და სპორტის მინისტრმა აბიდ რაჯამაც დაუჭირა:

"ეს დიდი სისულელეა. ამ მაჩო და კონსერვატიულ საერთაშორისო სპორტში გარკვეული მიდგომები უნდა შეიცვალოს", — აღნიშნა მინისტრმა.

რამდენიმე დღეში კი გუნდს მომღერალი Pink გამოეხმაურა და განუცხადა, რომ ჯარიმას მათ მაგივრად გადაიხდიდა.

"ძალიან ვამაყობ ნორვეგიის ქვიშის ხელბურთის ქალთა გუნდით, რადგან მათ გააპროტესტეს მათი 'უნოფორმის' შესახებ არსებული სექსისტური წესები. ევროპის ხელბურთის ფედერაცია სექსიზმის გამო უნდა დაჯარიმდეს. ყოჩაღ, ქალებო! დიდი სიამოვნებით გადავიხდი თქვენს ჯარიმას. ეგრე გააგრძელეთ", — დაწერა Pink-მა ტვიტერზე.

ამის შემდეგ ქალების მხარდასაჭერად ნორვეგიელმა აქტივისტმა ტალიტა სტოუნმა კამპანია წამოიწყო და 61 000 ხელმოწერა შეაგროვა.

"იმედი მაქვს, ეს სპორტში სექსიზმის და ქალებისა და გოგოების განივთების დასასრულის დასაწყისია და მომავალში ყველა გოგოსა და ქალს ექნება შესაძლებლობა, ისე იასპარეზოს, რომ შეუსაბამო სამოსსა და სექსუალურ შევიწროებაზე არ იდარდოს", — განაცხადა სტოუნმა.

ქალთა ხელბურთის გუნდის ფორმა ცვლილებებამდე და ცვლილებების შემდეგ

ფოტო: International Handball Federation

ხელბურთის საერთაშორისო ფედერაციამ წესებში ცვლილება მსოფლიო მედიებთან ოფიციალური განცხადების გარეშე შეიტანა. ოქტომბერში სპორტსმენებს ჩაცმულობასთან დაკავშირებული რეგულაციები შეცვლილი დახვდათ. ცვლილების მიხედვით, ქალებს შეუძლიათ ტანზე მომდგარი მაისურები და "შორტები" ჩაიცვან. ბიკინის ქვედატანი და მოკლე ზედატანი სავალდებულო აღარაა.

შეუსაბამო და არაკომფორტული სპორტული ფორმები ქალებმა არაერთხელ გააპროტესტეს. ცოტა ხნის წინ ამ პრობლემას გერმანელი ტანმოვარჯიშეები საკუთარი კოსტიუმებით დაუპირისპირდნენ. გერმანელი ტანმოვარჯიშე სარა ფოსი ორ თანაგუნდელთან ერთად ჩემპიონატზე გამოჩნდნენ კოსტიუმებით, რომლებიც სხეულს მთლიანად ფარავდა.

ამავე თემაზე: