ნაციონალური მოძრაობის ქუთაისის მერობის კანდიდატი, ხატია დეკანოიძე ქუთაისში 20 უბნის გადათვლას და რამდენიმე უბნის შედეგების გაბათილებას მოითხოვს. ამის შესახებ მან სპეციალურ ბრიფინგზე ისაუბრა.

"124 უბნიდან დისბალანსი იყო 20 უბანზე, ანუ ბალანსი არ ჯდება. შესაბამისად, ჩვენთვის ძალიან მნიშვნელოვანია, მოვითხოვოთ გადათვლა იმ 20 უბანზე, სადაც არ დაჯდა ბალანსი, იმიტომ, რომ როგორც წესი, ამ 20 უბანზე და კიდევ უფრო მეტ უბანზე გამწესებულები იყვნენ ქართულ ოცნებასთან აფილირებული ადამიანები, ვინც წარმოადგენენ საოლქო საარჩევნო კომისიაში ე.წ. დამოუკიდებელ ტრენერებს", — განაცხადა მან.

მან ასევე აღნიშნა, რომ ქუთაისში, სადაც 124 უბანია, ქართული ოცნების კანდიდატმა ოპოზიციის კანდიდატს გაუსწრო მხოლოდ 2 222 ხმით, საერთო ბათილი ბიულეტენების რაოდენობა კი ჯამში 2 396 იყო, ანუ გაცილებით უფრო მეტი, ვიდრე კანდიდატებს შორის სხვაობა. ის, ასევე, მოითხოვს ამ ბათილი ბიულეტენების გადათვლას. ამასთან, ის განსაკუთრებით გამოყოფს კოვიდუბანს და აცხადებს, რომ იქ არ მოქმედებდა არანაირი ფარულობის პრინციპი და დაფიქსირდა დისბალანსიც.

"კოვიდუბანზე დარეგისტრირებული ადამიანების რაოდენობა იყო 518, აქედან მონაწილეობა მიიღო 441 და მხოლოდ 68 ხმა აიღო ოპოზიციურმა და 356 — ქართული ოცნების კანდიდატმა. 15 არის ბათილი. კოვიდუბანზე, სადაც არ მოქმედებდა არანაირი ფარულობის პრინციპი, მათ შორის ამ უბანზე არის დისბალანსი. შესაბამისად, ჩვენ მოვითხოვთ ამ უბნის არა მხოლოდ გადათვლას, არამედ გაბათილებას, იმიტომ, რომ ამხელა სხვაობა, რა თქმა უნდა, წარმოუდგენელია და მათ შორის, ფარულობის დარღვევის პრინციპის გათვალისწინებით, ეს არის კიდევ ძალიან მნიშვნელოვანი", — აღნიშნა დეკანოიძემ.

მისივე თქმით, პრობლემები შეიქმნა გადასატანი ყუთის შემთხვევაშიც და მათ ამომრჩევლებს არ ეძლეოდათ იქ რეგისტრაციის გავლის საშუალება. დეკანოიძის განცხადებით, არ იციან რა პირობებში ტარდებოდა არჩევნები სასჯელაღსრულების დაწესებულებაშიც, სადაც 155 ადამიანი დარეგისტრირდა, რომელთაგან 123-მა ხმა ქართული ოცნების კანდიდატს მისცა.

"გამოიკვეთა ძალიან ბევრი უბანი, სადაც რეალური მანიპულაცია და ზემოქმედება ადამიანის ნებაზე იყო იმდენად თვალსაჩინო, რომ ეს, რა თქმა უნდა, ახდენდა გავლენას ადამიანების ნებაზე და ამ უბნების გაბათილებას მოვითხოვთ, ვინაიდან გვაქვს ყველა ის ვიდეო მტკიცებულება, რომელიც გულისხმობს, რომ ადამიანების კონცენტრაცია ამ უბნებზე ჰქონდათ ძალიან მნიშვნელოვანი გავლენა ამომრჩევლის ნებაზე. ეს უბნებია: 15, 14, 40, 41, 43, 69, 70, 71", — ამბობს ის.

ნახეთ არჩევნების მეორე ტურის შედეგები დეტალურად On.ge-ზე: