ნაციონალური მოძრაობის ქუთაისის მერობის კანდიდატის, ხატია დეკანოიძის განცხადებით, ხელისუფლება ცდილობს გააყალბოს არჩევნები და არაკეთილსინდისიერი გზით მოიპოვოს გამარჯვება. დეკანოიძე საოლქო საარჩევნო კომისიას მოუწოდებს, რომ მოახდინოს სწრაფი რეაგირება და პროცესის სამართლიან გარემოში წარმართვას ხელი შეუწყოს.

"ჩვენი დამკვირვებლები უბანზე წარმოუდგენელ გმირობას ჩადიან. ადგილი აქვს არაერთ დარღვევას. მაგალითად, მე-14 უბანზე დაფიქსირდა თანხების გადაცემა იმ სიის მიხედვით, რომელიც ქართული იცნების კოორდინატორს აქვს. იგივე უბანზე ერთ-ერთ ჟურნალისტს თავს დაესხნენ. გარდა ამისა, 124-ე უბანზე არ ემთხვევა სამაგიდო და კედლის სია ერთმანეთს. ყველაზე დიდი დარღვევა რაცაა, არის ის, რომ კოორდინატორებს ხელში უჭირავთ სამაგიდო სიები. 57-ე უბანზე არაუფლებამოსილმა პირმა მისცა ხმა. 121-ე უბანზე გადასატან ყუთზე არ დაემთხვა რამდენიმე ადამიანის ვინაობა. ისინი ჩვენს დამკვირვებლებს უშლიან ხელს საქმინობაში. მივმართავ საოლქო საარჩევნო კომისიას დაუყოვნებლივ გამოასწოროს ეს ყველაფერი იმიტომ, რომ შედეგები ძალიან მძიმე იქნება", — განაცხადა დეკანოიძემ.

მერობის კანდიდატმა ასევე ისაუბრა ქუთაისის დასუფთავების სამსახურის თანამშრომლებზე, რომლებსაც, მისი თქმით, პირადობები ჩამოართვეს, რათა ხმის მიცემის პროცესში მონაწილეობა ვერ მიიღონ.

"ქუთაისის დასუფთავების სამსახურის 400 თანამშრომელს ჩამოართვეს პირადობები, რათა მათ წაართვან ხმის მიცემის უფლება. რამდენიმემ მოგვმართა და ჩვენი ჩარევით დაუბრუნეს. ეს არის დანაშაული და მივიღებთ შესაბამის ზომებს", — თქვა დეკანოიძემ.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.

არჩევნების შესახებ ყველა სიახლეს შეგიძლიათ On.ge-ზე გაეცნოთ: