ოპოზიციის დამკვირვებლის თქმით, საბურთალო 44-ე უბანზე საჩივრის დაწერის უფლება იქამდე არ მისცეს, სანამ უბანზე მედიის წარმომადგენლები არ მივიდნენ. მისივე თქმით, ემუქრებოდნენ გაძევებით.

როგორც ის On.ge-სთან საუბარში აცხადებს, ერთ-ერთ ამომრჩეველს საკუთარ გრაფაში სხვა ადამიანის ხელმოწერა დახვდა, რის შემდეგაც დამკვირვებლებმა შეამოწმეს პირადი მონაცემები, დაადასტურეს ავთენტურობა და გადაწყვიტეს საჩივრის დაწერა.

"მე მოვითხოვე საჩივრის დაწერა და მივიღე პასუხი, რომ არ დამაწერინებდნენ, შემოვიდნენ კონფლიქტში. მითხრეს, რომ გამაძევებდნენ უბნიდან თუ საჩივრის დაწერას კიდევ ერთხელ მოცითხოვდი. შემდეგ დავუძახე მედიის წარმომადგენლებს და როდესაც მედიის წარმომადგენელი მოვიდა ჩვეულებრივ მომცეს საჩივრის დაწერის უფლება. საჩივარი უკვე ჩაბარებული და დადასტურებულია, მოგვცეს ჩაბარების ფურცელიც", — განაცხადა მან.

On.ge-ს კითხვაზე, რატომ მისცა დამკვირვებელს საჩივრის დაწერის უფლება მხოლოდ მედიის მისვლის შემდეგ, კომისიის თამვჯდომარე ამბობს, რომ ჟურნალისტის მისვლაზე ინფორმაცია არ აქვს. მისი თქმით, ახსნა-განმარტების ოქმი დაწერა და პრობლემაც აღმოფხვრა.

"აღმოჩნდა, რომ გრაფაში ხელმოწერა გააკეთა ამომრჩეველმა შეცდომით. შემდეგ, როდესაც მოვიდა იმ გრაფის ამომრჩეველი, მასაც მოვაწერინეთ ხელი. მე აღმოვფხვერი პრობლემა, დავწერე ახსნა-განმარტების ოქმი", — განაცხადა თავმჯდომარემ.

დღეს, 30 ოქტომბერს ადგილობრივი თვითმმართველობის არჩევნების მეორე ტური იმართება. მერი 15 თვითმმართველ თემსა და 5 თვითმმართველ ქალაქში, მათ შორის, თბილისში აირჩევა. გარდა ამისა, მეორე ტური გაიმართება 24 საარჩევნო ოლქში, რომლის შედეგად აირჩევა 42 მაჟორიტარი.

არჩევნების შესახებ ყველა სიახლეს შეგიძლიათ On.ge-ზე გაეცნოთ: