ექსპრეზიდენტ მიხეილ სააკაშვილის ადვოკატის, ბექა ბასილაიას განცხადებით, მათთვის არავის უთქვამს, რომ დაწესებულებაში შესასვლელად PCR ტესტი იყო საჭირო. ასე პასუხობს ის პენიტენციური სამსახურის მიერ გამოქვეყნებულ განცხადებას, რომლის მიხედვითაც, როგორც სააკაშვილი, ასევე, ადვოკატები კოვიდრეგულაციებს არღვევდნენ.

"არავის არ უთქვამს, რომ ყოველ ჯერზე მოიტანეთ PCR ტესტი, უფრო მეტიც, მათ გვითხრეს, რომ PCR ტესტის აუცილებლობა არ იდგა, რადგანაც, ყოველ ჯერზე ისედაც იღებდენ სწრაფ ტესტს", — ამბობს ის TV პირველთან.

ადვოკატის თქმით, მათ არც ის უთქვამს, რომ სააკაშვილისთვის წერილის გადაცემა და მის მიერ პირბადის არტარება წარმოადგენდა პრობლემას. ბასილაია მიიჩნევს, რომ შეხვედრის ოთახში მინის ბარიერის აღმართვის მიზანი კონფიდენციალური კომუნიკაციისთვის ხელის შეშლაა.

"მათ უბრალოდ უნდათ, რომ შეგვიშალონ ხელი კონფიდენციალურ კომუნიკაციაში, უნდათ, რომ რას ვწერთ მიხეილ სააკაშვილს და რა პასუხს ვიღებთ მისგან, ეს აკონტროლონ", — აღნიშნა ბასილაიამ.

დღეს, 28 სექტემბერს პენიტენციურმა სამსახურმა შეხვედრების ოთახში მინის ბარიერის აღმართვა ახსნა იმით, რომ ექსპრეზიდენტი, მიხეილ სააკაშვილი და მისი ადვოკატები კოვიდრეგულაციებს არღვევდნენ. კერძოდ, უწყების განმარტებით, წერილებს ისინი ერთამანეთს "მაგიდაზე ასვლის გზით" აწვდიდნენ. ამასთან, სააკაშვილი უარს ამბობდა პირბადის გამოყენებაზე.

გუშინ, 27 ოქტომბერს სააკაშვილის ადვოკატმა, დიმიტრი საძალიშვილმა განაცხადა, რომ შეხვედრის ოთახში სივრცე, საიდანაც სააკაშვილს წერილებით ეკონტაქტებოდნენ, ბადით დაფარეს. იმავე დღეს მიხეილ სააკაშვილმა განაცხადა, რომ სანამ შეხვედრათა ოთახს პირვანდელი სახე არ დაუბრუნდება, სააკაშვილი მკურნალობაზე უარს ამბობს.

მანამდე, 26 ოქტომბერს ნაციონალური მოძრაობის სენაკის მერობის კანდიდატმა, კობა ნაყოფიამ განაცხადა, რომ სააკაშვილთან მიმსვლელებს ციხიდან წერილის გამოტანის უფლებას არ აძლევენ. როგორც მან აღნიშნა, დაწესებულებაში შესვლისას გააფრთხილეს, რომ სააკაშვილის წერილის გამოტანა არ შეიძლება. ნაყოფია ამბობდა, რომ ექსპრეზიდენტისგან წერილების მიღება ამიერიდან მხოლოდ ფოსტის ან ადვოკატების დახმარებით იქნებოდა შესაძლებელი. აღნიშნულს პენიტენციურმა სამსახურმა იმავე დღეს უპასუხა. მათი განცხადებით, პატიმართან შეხვედრაზე მისული პირისთვის რაიმე სახის კორესპონდენციის გადაცემა და გამოტანა არც ერთ პენიტენციურ დაწესებულებაში არ ხდება. მათივე თქმით, ადვოკატიც არ არის უფლებამოსილი, რომ ციხიდან ბრალდებულის წერილები გამოიტანოს.

მიხეილ სააკაშვილი პირველ ოქტომბერს დააკავეს. ის 28-ე დღეა შიმშილობს.