ექსპრეზიდენტ მიხეილ სააკაშვილის ადვოკატის გიორგი გელხაურის თქმით, სააკაშვილის ჯანმრთელობის მდგომარეობის გარკვევა რთული ხდება, რადგან სააკაშვილი ანალიზებს აღარ იკეთებს. ადვოკატის თქმით, სისუსტე ძლიერდება.

"რამდენიმე დღის წინ სასიცოცხლო ნიშნული ზღვარს ქვემოთ იყო ჩამოსული, თუმცა შემდეგ მედიკამენტოზური მკურნალობითა და გადასხმებით უკვე ეს დარეგულირდა და დაბალანსდა. დღეს უკვე ამას ვეღარ ვიგებთ იმიტომ, რომ ანალიზებზე უარს ამბობს და აქედან გამომდინარე, გაურკვეველ ვითარებაში ვვარდებით, სასიცოცხლო ნიშნული ზღვარს ქვემოთაა თუ არა. სისუსტე ძლიერდება, გადაადგილებაც, ბუნებრივია, უჭირს, იმიტომ, რომ ყოველგვარ გადასხმაზე უარს ამბობს. ასე დიდხანს ვეღარ გაგრძელდება", — თქვა ადვოკატმა ჟურნალისტებთან.

ექსპრეზიდენტი შიმშილობასთან დაკავშირებულ სამედიცინო დახმარების მიღებაზე უარს მანამ ამბობს, სანამ შეხვედრათა ოთახს პირვანდელი სახე არ დაუბრუნდება.

სააკაშვილის ადვოკატის დიმიტრი საძაგლიშვილის განცხადებით, ციხეში, შეხვედრის ოთახში სივრცე, საიდანაც წერილებს აწვდიდნენ, ბადით დაფარეს. საძაგლიშვილის თქმით, ამის მიზანი ადვოკატებსა და სააკაშვილს შორის პირდაპირი კომუნიკაციისთვის ხელის შეშლა და მათი საუბრის ხელისუფლების მხრიდან გაკონტროლებაა.

საქართველოს ექიმთა საერთაშორისო ასოციაცია მოითხოვს, მიხეილ სააკაშვილი მრავალპროფილურ საავადმყოფოში გადაიყვანონ, სადაც საჭიროების შემთხვევაში ნებისმიერი პროფილის, დროული და კვალიფიციური სამედიცინო დახმარება, ამით კი მისი სიცოცხლის უფლება იქნება დაცული.

მიხეილ სააკაშვილი პირველ ოქტობერს, მას შემდეგ დააკავეს, რაც სოციალურ ქსელში ვიდეო გაავრცელა, სადაც ჩანდა, რომ საქართველოში იმყოფებოდა. ის 28 დღეა შიმშილობს.

ექსპრეზიდენტის ექიმი და ადვოკატები მის სათანადოდ აღჭურვილ სამოქალაქო კლინიკაში გადაყვანას ითხოვენ. მათი თქმით, პენიტენციური სამსახურის მე-18 სამედიცინო დაწესებულება არ არის აღჭურვილი იმ აპარატურით, რაც საჭიროა მიხეილ სააკაშვილის ჯანმრთელობის მონიტორინგისა და მკურნალობისთვის.

სახალხო დამცველიც მიიჩნევს, რომ ციხის საავადმყოფო სრულად არ შეესაბამება ექიმთა კონსილიუმის რეკომენდაციებს და ამასთან, არსებობს რისკები ექსპრეზიდენტის უსაფრთხოებაზეც.

ჯანდაცვის მინისტრის, ეკატერინე ტიკარაძის მტკიცებით, მიუხედავად იმისა, რომ მე-18 სამედიცინო დაწესებულებას არ აქვს გადაუდებელი მიღების შესაძლებლობა, ის სრულადაა აღჭურვილი იმისთვის, რომ საჭიროების შემთხვევაში, მიხეილ სააკაშვილი მიიღოს. იგივე პოზიცია აქვს იუსტიციის სამინისტროსაც.

პრემიერმინისტრი ირაკლი ღარიბაშვილი კი ამტკიცებს, რომ სააკაშვილს აქვს "ილუზიები", თითქოს კერძო კლინიკაში გადაყვანის შემთხვევაში, 30 ოქტომბერს მისი მხარდამჭერები მობილიზდებიან და გაათავისუფლებენ. რაც შეეხება სააკაშვილის კერძო საავადმყოფოში გადაყვანას, ღარიბაშვილი აცხადებს, რომ ციხის საავადმყოფოში ყველა პირობა არის შექმნილი და ეს გადაწყვეტილება "არ გადაიხედება".