ქართული ოცნების თავმჯდომარე, ირაკლი კობახიძე ამბობს, რომ ქართული ოცნების მიერ გამართული აქციის ერთ-ერთი მიზანი ძალის დემონსტრირება იყო და საზოგადოებამ დაინახა, თუ სად არის ხალხის ნამდვილი ძალა.

"რა თქმა უნდა, ესეც არის ნებისმიერი ასეთი შეკრების, ასეთი საარჩევნო შეკრების, ერთ-ერთი მიზანი. ამის ერთ-ერთი ამოცანაა, ბუნებრივია, ძალის დემონსტრირება და დღეს საზოგადოებამ დაინახა რეალურად სად არის ხალხის ნამდვილი ძალა. ნუ, შედარებებს არ გავაკეთებ, არ არის ეს ალბათ მიზანშეწონილი", — აცხადებს კობახიძე რუსთავი 2-ის ეთერში.

მისივე თქმით, აქციაზე მყოფთა რაოდენობა ბევრად აღემატებოდა 14 ოქტომბერს ნაციონალური მოძრაობის აქციაზე შეკრებილთა რიცხვს.

"მე ხატოვნად ვთქვი, ერთხელ რომ დაგვჭირდებოდა იმდენი მძღოლი, რამდენიც აქციაზე ჰყავდათ შეკრებილი ნაცმოძრაობის წარმომადგენლებს და ეს არ იყო მარტო სიტყვის მასალად ნათქვამი, რეალურად ჩვენი მხარდამჭერების მობილიზაციისთვის დაგვჭირდა სერიოზული რესურსი და ეს ყველაფერი აჩვენებს იმას, რომ ჩვენი მხარდაჭერების რაოდენობა იყო რამდენჯერმე მეტი, ვიდრე ოპონენტების", — აღნიშნავს ის.

დღეს, 27 ოქტომბერს აქცია ქართულმა ოცნებამაც გამართა. მათ მიერ დაანონსებული "პარტიის მხარდამჭერების შემაჯამებელი საარჩევნო შეკრება" თბილისში, თავისუფლების მოედანზე გაიმართა.

გაიგე მეტი: