დაცვის პოლიციის თანამშრომელმა, საბა კოხალეიშვილმა თანამდებობა პროტესტის ნიშნად დატოვა. მისი თქმით, ის სოლიდარობას უცხადებს, ლექსო რაფავას და გია დათიაშვილს.

"ამათ ბრძანებებს რომ არ ასრულებენ, მაგიტომ ტოვებენ სამსახურს, ავდექი და მეც მივატოვე, ვუცხადებ სოლიდარობას ლექსო რაფავას და გია დათიაშვილს", — ამბობს საბა კოხალეიშვილი.

კოხალეიშვილი შსს-ს უკვე მე-7 თანამშრომელია, ვინც პროტესტის ნიშნად სამსახურიდან წავიდა. გუშინ, 25 ოქტომბერს თანამდებობები დატოვეს, იმერეთში განსაკუთრებულ დავალებათა სამმართველოს ინსპექტორმა, რომან ანთიამ, სამეგრელოში კი სამეგრელო-ზემო სვანეთის საპატრულო პოლიციის პატრულ-ინსპექტორმა, პოლიციის მაიორმა გიორგი ბერიშვილმა და კრიმინალური პოლიციის თანამშრომელმა, ჯიმი გაგუამ.

მანამდე 21 ოქტომბერს სამსახურიდან წავიდა სამეგრელო-ზემო სვანეთის სასაზღვრო პოლიციის თანამშრომელი, რევაზ ლაზიშვილი, 22 ოქტომბერს კი, შსს-ს გენერალური ინსპექციის დეპარტამენტის ოპერატიული უზრუნველყოფის მეორე სამმართველოს უფროსის მოადგილე, ჭაბუკა რაფავა. 23 ოქტომბერს თანამდებობა დატოვა სამეგრელოში პატრულ-ინსპექტორმა, ომარ არქანიამაც.

20 ოქტომბერს, ღამით ხობში ორი ყოფილი ძალოვნის, ლექსო რაფავასა და რუსლან შამახიას საცხოვრებელი სახლები გაჩხრიკეს. რაფავა დააკავეს, შამახიას თქმით კი, წაიღეს მის სახელზე გაფორმებული იარაღი. ენმ აცხადებს, რომ ლექსო რაფავას იარაღი და ხელყუმბარა ჩაუდეს. შსს-ს ცენტრალური კრიმინალური პოლიციის დეპარტამენტის დირექტორმა, მამუკა ჭელიძემ ჟურნალისტების კითხვას მომხდართან დაკავშირებით უპასუხა, რომ სტანდარტული საპოლიციო ღონისძიებები განხორციელდა. სხვა კომენტარს შსს ამ ეტაპზე არ აკეთებს.