ფინანსთა სამინისტროს საგამოძიებო სამსახურის ინფორმაციით, თბილისსა და იმერეთში ყალბი კოვიდპასპორტების დამზადებისთვის 9 პირი პასუხისგებაში მიეცა, მათგან ერთი კი დააკავეს. უწყება ამბობს, რომ მან 70 ევროდ ყალბი დოკუმენტები დაამზადა, შემდეგ კი იუსტიციის სახლის კუსტარულად დამზადებული სველი ბეჭდით დაამოწმა.

"გამოძიებით დადგინა, რომ ერთ შემთხვევაში, ბრალდებულმა თბილისში მდებარე ტურისტულ კომპანიაში კოვიდვაქცინაციის გარეშე საზღვარგარეთ გამსვლელი მგზავრებისთვის გათვალისწინებული სავალდებილო კარანტინისგან თავის არიდების მიზნით, მოქალაქეს დაუმზადა ორი ერთეული ყალბი კოვიდპასპორტი, თითოეული 70 ევროს სანაცვლოდ, რომელშიც შეიტანა ყალბი მონაცემები დოკუმენტის მიმღები პირის მიერ ჩატარებული კოვიდვაქცინაციის სრული კურსისა და შესაბამისი ლაბორატორიული კვლევების უარყოფითი შედეგების თაობაზე, რის შემდეგად დოკუმენტები დაამოწმა საქართველოს იუსტიციის სამინისტროს სსიპ იუსტიციის სახლის ყალბი, კუსტარულად დამზადებული სველი ბეჭდით", — აცხადებენ საგამოძიებო სამსახურში.

ამასთან, მათივე ინფორმაციით, იმერეთში გამოვლენილია 8 ადამიანი, რომლებმაც სახელმწიფო საზღვრის გადაკვეთისას თითქოსდა სამედიცინო დაწესებულების სახელით გაცემული PCR ტესტირების უარყოფითი პასუხები შეიძინეს და გამოიყენეს.

უწყებაში ამბობენ, რომ გამოძიების შედეგად, როგორც ყალბი დოკუმენტები და ბეჭდები, ასევე, სხვა მოქალაქეებზე გასაღების მიზნით დამზადებული ყალბი კოვიდპასპორტები და მათ დასამზადებლად გამოყენებული კომპიუტერული ტექნიკა ამოიღეს.

მათივე ცნობით, გამოძიება სისხლის სამართლის კოდექსის 362-ე მუხლის პირველი ნაწილით მიმდინარეობს, რაც ყალბი პირადობის მოწმობის ან სხვა ოფიციალური დოკუმენტის, ბეჭდის, შტამპის ან ბლანკის დამზადებას, შეძენას, შენახვას გასაღების მიზნით, გასაღებას ან გამოყენებას გულისხმობს. დანაშაული 3 წლამდე ვადით თავისუფლების აღკვეთას ითვალისწინებს.