დარწმუნებული არ ვართ, თქვენთვის რას ნიშნავს 25 აგვისტო, თუმცა ფლორიდელი ლამერტების ოჯახისათვის ამ დღეს სამმაგი დატვირთვა აქვს. ოჯახში სამივე ბავშვი, 6 წლის სოფია, 3 წლის ჯულიანა და 2 თვის მია, ზუსტად ერთსა და იმავე დღეს, 25 აგვისტოს, ერთი და იმავე სამწლიანი დროის შუალედით დაიბადა.

"ეს, უბრალოდ, წარმოუდგენელია", — ამბობს გოგოების დედა, კრისტინ ლამერტი, — "ჩვენ ამას ნამდვილად არ ვგეგმავდით, თუმცა, საბოლოოდ, მაინც საოცრად განსაკუთრებული და გამორჩეული ამბავი აღმოჩნდა, თითქოს ბედისწერაა".

კიდევ უფრო საინტერესო კი ამ ამბავში ისაა, რომ, წესით, არცერთი მათგანი 25 აგვისტოს არ უნდა დაბადებულიყო.

როგორც კრისტინი იხსენებს, ყველაფერი 2015 წელს დაიწყო, როცა ოჯახის პირველი შვილი, სოფია, დაგეგმილზე ორი დღით გვიან, 25 აგვისტოს დაიბადა.

მეორე შვილზე ორსულობისას, სიტუაცია ცოტათი გართულდა. ამის მიუხედავად, მშობლები აუღელვებლად ელოდებოდნენ 29 აგვისტოს, როცა ჯულიანა უნდა დაბადებულიყო. კრისტინი ხუმრობს, ჯულიანამ ძალიან მოინდომა, რომ დასთან საზიარო დაბადების დღე ჰქონოდა და დაგეგმილზე ოთხი დღით ადრე გაჩნდაო.

როცა მიას ჯერი მოვიდა, ყველაფერი წინაზე უფრო მეტად გართულდა, რადგან 10 კვირის ორსული კრისტინი კორონავირუსით დაინფიცირდა. მუდმივი მეთვალყურეობის ქვეშ მყოფი ქალი მესამე შვილს 8 სექტემბერს ელოდებოდა, თუმცა, მიამ მე რაღატომ უნდა ვიყო გამონაკლისიო და ისიც, არც მეტი, არც ნაკლები, 25 აგვისტოს დაიბადა.

ცნობილ გამოთქმას თუ დავუჯერებთ, დამთხვევის შემდეგ უკვე კანონზომიერება მოდის, თუმცა, ამ უცნაური ამბით მინესოტის სოციოლოგიის პროფესორი მაინც დაინტერესდა და განაცხადა, ასეთი შემთხვევის ალბათობა მილიონში მხოლოდ 8 არისო. კრისტინი და თავისი ქმარი, ნიკი, ამის შეტყობამ უფრო გააოცა.

"ყოველთვის ვიცოდით, რომ სამი შვილის ყოლა გვსურდა სამწლიანი შუალედებით, თუმცა, ერთსა და იმავე დღეს მათი დაბადება წინასწარ არ განგვიზრახავს", — ამბობს კრისტინი, — "წინასწარ ვერაფერს დაგეგმავ, რასაკვირველია, თუმცა, ვეცადეთ, მესამეს დაბადებისთვის მაინცდამაინც სექტემბერი არ შეგვერჩია. თუმცა, როგორც ჩანს, პატარა მიას სულ სხვა გეგმა ჰქონდა".

როგორც ბავშვების დედა იხსენებს, უფროს შვილებს მიას დაბადების თარიღის შეტყობა უფრო მეტად გაუხარდათ, ვიდრე გაუკვირდათ.

"რომ ვუთხარი, რომ მათი დაც 25 აგვისტოს დაიბადებოდა, სიხარულისგან ჭყლოპინი მორთეს", — დასძენს კრისტინი, — "ძალიან გაუხარდათ, რომ სკოლაში, მასწავლებლებთან და მეგობრებთან ამის მოყოლის საშუალება მიეცათ".

თუმცა, გოგოებს საზიარო არა მხოლოდ დაბადების დღის თარიღი, არამედ ხასიათიც აქვთ. კრისტინის თქმით, მათ თვალშისაცემად განსაკუთრებული ურთიერთობა აქვთ, სოფიასა და ჯულიანას კი კამათი მხოლოდ იმაზე მოსდით, ვის უფრო დიდხანს ეჭირება მია ხელში.

მომავალზე საუბრისას დების დედა აღნიშნავს, რომ ერთი სული აქვს, როდის გაიცნობს გაზრდისას საკუთარ შვილებს უკეთ.

"სოფიას და ჯულიანას ისეთი ურთიერთობა აქვთ, იმის იმედადღა ვარ, რომ მიასაც მიიღებენ 'გუნდში'", — ამბობს იგი, — "მოუთმენლად ველოდები, როდის ვიზეიმებთ მათ დაბადების დღეებს ერთად და დიდხანს მოსაგონარ ოჯახურ მომენტებს გავიზიარებთ".

მთელი ოჯახი კი ასევე დიდი აღტაცებით ელოდება, რა რეაქცია ექნება ხალხს, როცა შეიტყობენ რომ სამივე და ერთსა და იმავე დღეს დაიბადა.

და არა მხოლოდ და — ბოლოს სიურპრიზად შემოგინახეთ, რომ ოჯახის ძაღლი, კოდა ბიერი, რომელიც წელს 16 წლის გახდა, ასევე 25 აგვისტოსაა დაბადებული.