ქართული ოცნების თავმჯდომარე, ირაკლი კობახიძე ამბობს, რომ პარტიის დაანონსებულ შეკრებაზე იმდენი მარტო მძღოლი იქნება საჭირო, რამდენი ადამიანიც ნაციონალური მოძრაობის აქციაზე იყო. ჟურნალისტის კითხვაზე, არის თუ არა ეს შეკრება 14 ოქტომებერს ჩატარებული აქციის კონტრაქცია, კობახიძე ამტკიცებს, რომ არა და აღნიშნულს ენმ-ის მესიჯბოქს უწოდებს.

"რაც შეეხება, ე.წ. კონტრაქციას, ეს არის ის მესიჯბოქსი, რომელიც დაალაგეს ნაციონალური მოძრაობის წარმომადგენლებმა. არანაირი კონტრაქცია ეს არ არის, ეს არის შემაჯამებელი საარჩევნო აქცია. მარტივად რომ გითხრათ, რამდენი კაციც ჰყავდათ მათ შეკრებილი თავიანთ აქციაზე, იმდენი მარტო მძღილი გვჭირდება, რომ ხალხი ჩამოვიყვანოთ თბილისში. ახლა თქვენ თვითონ შეგიძლიათ განსაჯოთ, ეს არის კონტრაქცია თუ ნამდვილი, რეალური აქცია, რომლის მიზანია, ხალხისთვის, საზოგადოებისთვის თავისი ძალის კიდევ ერთხელ ჩვენება", — აცხადებს კობახიძე.

დღეს ირაკლი კობახიძემ 27 ოქტომბერს თავისუფლების მოედანზე ქართული ოცნების აქცია დააანონსა და მას "პარტიის მხარდამჭერების შემაჯამებელი საარჩევნო შეკრება" უწოდა.

14 ოქომბერს თავისუფლების მოედანზე ექსპრეზინდენტ მიხეილ სააკაშვილის მხარდამჭერი აქცია გაიმართა., სადაც ათეულობით ათასი ადამიანი იყო შეკრებილი.

2 ოქტომბერს საქართველოში ადგილობრივი თვითმმართველობის არჩევნები გაიმართა. მოსახლეობა მერებსა და საკრებულოების წევრებს ირჩევდა. თუმცა ამჯერად ეს არ არის მხოლოდ თვითმმართველობის არჩევნები — მიუხედავად იმისა, რომ ქართულმა ოცნებამ შარლ მიშელის შეთანხმება ანულირებულად გამოაცხადა, ოპოზიცია ამ არჩევნებს რეფერენდუმს უწოდებს. სწორედ ამ დოკუმენტის მიხედვით, იმ შემთხვევაში, თუ ქართული ოცნება თვითმმართველობის არჩევნებზე 43%-ზე ნაკლებს აიღებდა, რიგგარეშე არჩევნები უნდა ჩატარებულიყო.

ცენტრალური საარჩევნო კომისიის მონაცემებით, თვითმმართველობის არჩევნების მეორე ტური 30 ოქტომბერს 20 მუნიციპალიტეტში გაიმართება. მეორე ტური ჩატარდება თბილისშიც.