ექსპრეზიდენტმა მიხეილ სააკაშვილმა ბათუმში, მისი მხარდამჭერი აქციის მონაწილეებს წერილით მიმართა. მისი თქმით, "ქათქათა ბათუმს" ნიშნავს, რომ ბათუმში ლურჯი დროშების ნაცვლად, ხუთჯვრიანი დროშები აფრიალდება. სააკაშვილი ამბობს, რომ გიორგი კირთაძე და მიშა ბოლქვაძე ბათუმისა და ხელვაჩაურის ისტორიაში საუკეთესო მერები იქნებიან. ექსპრეზიდენტი აღნიშნავს, რომ მათი გამარჯვების მერე, ბათუმელებს რუსთავში ელოდება, რათა მათაც გააღონ მისი "სატუსაღოს კარი"

"მათი გამარჯვების მერე, გელით რუსთავში, მინდა, რომ ჩემი სატუსაღოს კარი, მათ შორის ბათუმელებმაც გააღოთ. არც ერთი ადამიანი არ უნდა დარჩეს სახლში, ყველანი არჩევნებზე, არც ერთი წამით არ უნდა შევჩერდეთ, შევუტიოთ ყველა მიმართულებით. ჩვენ კი არ უნდა ვიცავდეთ მათგან თავს, ისინი არიან და უნდა დარჩნენ თავდაცვის რეჟიმის პოზიციაში, გაუმარჯოს ბათუმს, გაუმარჯოს აჭარას, გაუმარჯოს საქართველოს!", — წერს მიხეილ სააკაშვილი.

წერილში მიხეილ სააკაშვილმა აქციაზე შეკრებილებს მადლობა გადაუხადა და განაცხადა, რომ "მაგრად დგას" და მათთან პირდაპირ კონტაქტს ელის.

"მე მაგრად ვდგავარ, მოველი თქვენთან პირდაპირ კონტაქტს, მხდალმა ხელისუფლებამ სასამართლოზეც ვერ გაბედა ჩემი მიყვანა, სატელეფონო ზარები ამიკრძალა, მაგრამ ზუსტად ვიცი, რომ ისინი უკვე დამარცხებული და ჩვენ უკვე გამარჯვებულები ვართ", — წერს სააკაშვილი.

ბათუმში მიხეილ სააკაშვილის მხარდამჭერი აქცია გაიმართა. შეკრებილებს სიტყვით მიმართეს როგორც ნაციონალური მოძრაობის, ისე სხვა პარტიების წარმომადგენლებმა: ირაკლი კუპრაძემ, არმაზ ახვლედიანმა, ნინო ბურჯანაძემ და ა.შ. მათ აღნიშნეს, რომ ექსპრეზიდენტი პოლიტპატიმარია, ასევე, მოსახლეობას 30 ოქტომბრის არჩევნებზე მისვლისკენ მოუწოდეს და წარმატებები უსურვეს გიორგი კირთაძეს, რომელიც ბათუმის მერობისთვის იბრძვის.

მიხეილ სააკაშვილი პირველ ოქტომბერს დააკავეს. ის დაკავების დღიდან, 23 დღეა შიმშილობს. ჯანდაცვის სამინისტროს ბაზაზე შექმნილმა ექიმთა კონსილიუმმა მისი პროფილაქტიკური ჰოსპიტალიზაციის რეკომენდაცია გასცა. ჯერჯერობით უცნობია, როდის და სად გადაიყვანენ სააკაშვილს დამატებითი გამოკვლევებს ჩასატარებლად.